Mga Salmo 9 - Samarenyo Meaning-Based Bible (1984)

Pasalamat tungod han Hustisya han Dyos

¹ Ha bug-os nga kasingkasing ko, ha imo, Ginoo, ako magdadayaw; han mga buhat nga orosahon nimo, ngatanan akon igpapasangyaw.

² Tungod han Dyos nga Labi Kamakagarahum, hin pagdayaw, mag-aawit ako nga malipayon.

³ Pag-abot mo, inmisol an akon mga kaaway, hira ngatanan napukan ug nagkamatay.

⁴ Tangkod ngan tuptop an imo nga paghukom, ngan imo gin-upay an paghukom ha akon.

⁵ Ginsirotan mo an mga tawo nga pagano; an mga magraogdaog imo liwat ginpuo; ngan waray na mahinunumdom ha ira nga tawo.

⁶ An amon mga kaaway napukan na ha kadayonan, an ira mga syudad imo ginbungkag, ginpukan, ngan ha kadayonan hira hingangalimtan.

⁷ Kundi an Ginoo amo an hadi ha kadayonan; nagtindog hiya hin lingkoran nga hukmanan.

⁸ Matadong an iya paghadi han bug-os nga kalibutan; naghuhukom hiya han kanasoran dida hin katadongan.

⁹ Han mga ginraogdaog an Ginoo amo an darangpan, himyang nga arayopan ha panahon hin kasamokan.

¹⁰ Masarig ha imo, adton nakilala ha imo, Ginoo; kay diri ka nasalikway hadton nadangop ha imo.

¹¹ Ngadto han Ginoo, hadi han Sion, pag-awit kamo ha iya hin pagdayaw! An iya mga ginbuhat nga orosahon, ha kanasoran iyo igpasangyaw!

¹² An mga nag-aantos han Dyos hinnunumdoman, an ira mga pagtangis diri hinngangalimtan; adton magpakaraot ha ira, iya ginsisirotan.

¹³ Kalooyi ako ngan kitaa, Ginoo! Ha akon mga kaaway an gin-aantos ko! Ginoo, ha kamatayon bawia ako,

¹⁴ Basi ako makatukdaw ha atubangan han Jerusalem nga mga katawhan; ngan makagsumat ako ha ira ngatanan, an gindayaw ko ha imo nga mga butang. Nalilipay ako kay ikaw an akon katalwasan.

¹⁵ Nagbuho an mga tawo nga diri diyosnon; nahulog hira ngahaw ngadto hito nga luong; hira an hinsakban han bitik nga ira kalugaringon.

¹⁶ An Ginoo ha iya ngahaw nagpakita, pinaagi han matadong nga paghukom niya, an mga magraogdaog nahisakban han ira la ngahaw mga binuhatan.

¹⁷ An kamatayon amo an dadangatan, han ngatanan nga mga tampalasan; ug amo gihapon an sangpotanan, hadton masalikway han Dyos nga katawhan.

¹⁸ An mga nagkikinahanglan diri pasisibay-an, an paglaom han mga kablas ha kadayonan.

¹⁹ Pakadi, Ginoo! Ayaw itugot nga an tawo ha imo umato! Ha imo atubangan an mga diri diyosnon dad-on mo, ngan ipakita ha ira an matadong nga paghukom nimo.

²⁰ Mahadlok unta hira ha imo, Ginoo; makasabot unta nga may kamatayon hira nga tawo.