Mga Salmo 88 - Samarenyo Meaning-Based Bible (1984)

Nagtawag hin Pakibulig

¹ O Ginoo nga Dyos, akon magtaralwas, nagtatawag ako ha bug-os nga adlaw, ngan napakada ako ha imo atubangan ha gab-i.

² Pamatii an akon pag-ampo; dungga an akon pagtawag hin tambulig!

³ Dinmangat ha akon in damo gud nga kakurian ngan hirani na ako han kamatayon.

⁴ Sugad ako han ngatanan nga iba nga tikamaratay; waray na an ngatanan ko nga kusog.

⁵ Ginpabay-an ako tampo han mga patay; sugad ako han mga pinanmatay nga hinayad ha ira mga lubnganan, nga imo na hinngalimtan hin hingpit, nga diri na gud nimo mabubuligan.

⁶ Iginlabog mo ako ngadto han mga kahiladman han lubnganan, ngadto han gisisiromi ngan gihihilaromi nga luong.

⁷ Dinadat-ogan ako han imo kasina, ngan narurugmok ako ha ilarom han mga balod hito.

⁸ Ginpabayaan mo ako han akon mga kasangkayan; ginhimo mo ako nga kaharadlokan nira. Ginpriso ako ngan diri na makakapalagiw;

⁹ masirom an akon pagkita tungod hin kabidoan. O Ginoo, nagtatawag ako ha imo kada adlaw, ngan inaalsa ko an akon mga kamot ngadto ha imo ha pag-ampo!

¹⁰ Nagbubuhat ka ba hin mga milagro para han mga patay? Nabangon ba hira ngan nagdadayaw ha imo?

¹¹ Ginhihimangraw ba ha lubnganan an imo dayuday nga paghigugma, o an imo kamatinumanon ha dapit han kabungkagan?

¹² Hinkikit-an ba didto hito nga dapit han kasisidman an imo mga milagro, o an imo pagkamaupay ha tuna han kamatayon?

¹³ O Ginoo, nagtatawag ako ha imo hin pakibulig; nag-aampo ako ha imo kada aga.

¹⁴ Kay ano nga iginsisikway mo ako, Ginoo? Kay ano nga tinatagoan mo ako?

¹⁵ Nag-antos ako ngan nag-ikamaratay na tikang pa han akon pagkabata; guol na ako hin duro tungod han imo mga kastigo.

¹⁶ Nadagmak ha akon an imo mapintas nga kasina; naglalaglag ha akon an imo makaharadlok nga mga pagtimaraot.

¹⁷ Nagpapalibot hira ha akon sugad hin baha ha bug-os nga adlaw; gindudutdot ako nira paluyoluyo.

¹⁸ Ginpabayaan mo ako bisan pa han akon suok gud nga kasangkayan; an kasisidman nala an nahibilin nga akon kaupod-upod.