Mga Salmo 87 - Samarenyo Meaning-Based Bible (1984)

Nagdayaw han Jerusalem

¹ An Dyos an nagtindog hadton syudad niya, ha baraan nga bukid ini pagtindoga.

² Syudad Jerusalem iya hinigugma, labaw bis' diin ha Israel nga tuna.

³ Syudad han Dyos, imo na nga pamatian, Mga butang ur'sahon iya ginyakan:

⁴ “Paglista ko'n mga nasod nga natuman, lakip ko'n Ehipto ug Babilonia man. Ngan masiring ak' hiunong han Filistia, hiunong han Tiro ngan hadton Etiopia; nga hira ngatanan masasakop niya, masasakop han Jerusalem nga tuna.”

⁵ Hiunong han Sion ini'n igyayakan: tanan nasod maiiya ginsakopan; ngan an Dyos nga amo'n Labaw han ngatanan, mahatag gud ha iya hin karig-onan.

⁶ Malista'n Ginoo han mga katawhan, bas' magin taga-Jerusalem an tanan.

⁷ An ngatanan nga didto'n iya urokyan, magkakaranta ngan magsasarayaw man.