Mga Salmo 86 - Samarenyo Meaning-Based Bible (1984)

Pag-ampo hin Pakibulig

¹ Pamatii ngan batona ako, Ginoo, kay maluya ngan makalolooy ako.

² Talwasa ako ha kamot han kamatayon, kay ako ha imo matinumanon. Talwasa ako kay imo ako surugoon, ngan ha imo ako masinarigon.

³ Akon ikaw Dyos, kalooyi ako, ha bug-os nga adlaw nag-aampo ako ha imo.

⁴ An imo surugoon lipaya, Ginoo, kay maabot ha imo an akon mga pag-ampo.

⁵ Maupay ka ha amon ngan maloloy-on, hadton nag-aampo ha imo, ikaw mahigugmaon.

⁶ Pamatii, Ginoo, an akon mga pag-ampo, pamatii an akon pagtawag hin bulig ha imo.

⁷ Natawag ako ha imo ha takna hin kakurian, kay an akon mga pag-ampo imo pinamamatian.

⁸ Waray diyos nga sugad ha imo, Ginoo, ngan han imo mga buhat waray makakahimo.

⁹ An ngatanan nga imo ginhimo nga kanasoran, nayukbo pagdayeg han imo kagamhanan.

¹⁰ O Dyos makagarahum nagbuhat hin mga urosahon, waray gud iba, ikaw gud la an Dyos namon.

¹¹ Tutdoi ako, Ginoo, han imo karuyag, tutdoi ako hin mainampoon nga pag-alagad, nga tutumanon ko hin waray pagbaribad.

¹² Ako ha imo, Ginoo, kinasingkasing nagdadayaw, an imo gahom ha kadayonan akon igpapasangyaw.

¹³ Hin pagkadako han imo gugma nga waray pagkabalhin, ngan an akon kalag ha lubnganan waray mo igbilin.

¹⁴ O Dyos, an mga tawo nga mapahitas-on, nagkaabot hin pagkontra ha akon; buot ako patayon hin magbangis nga hugpo, hadton diri karuyag mamati ha imo.

¹⁵ Kundi ikaw Dyos an mahigugmaon ug maloloy-on, kanunay mailobon ug matinumanon.

¹⁶ Kalooyi gad ako ngan lingia, tagi hin kusog ngan dayon talwasa; kay nag-ataman ako ha imo hin dayuday, sugad gud han pag-alagad ni nanay.

¹⁷ Ipakita, Ginoo, an imo pagkamaupay, basi makaawod an ha akon nagtatamay; kon kumita hira han hatag mo nga pahalibway.