Mga Salmo 83 - Samarenyo Meaning-Based Bible (1984)

Pag-ampo para han Kapirdehan han mga Kaaway

¹ Ayaw na gad, O Dyos, ayaw na paghilom, ayaw na pagmingaw ngan ayaw na paghinadong.

² Tan-awa! Mga kaaway ha imo naato, nasupil adton nagdudumot ha imo.

³ Hilit nga paglarang supak han imo katawhan, sugad man hadton imo pinanalipdan.

⁴ Siring nira, “Gun-oba ta an ira nasod, an Israel hingalimtan na hin tinuod.”

⁵ Nagkauroyon hira han ira mga plano, nagkaurosa hira hin pagkontra ha imo:

⁶ mga tawo ha Edumea, mga Ismaelitanhon, mga tawo ha Moab, ngan Agaritanhon,

⁷ Gabal, Amon, Amalek nga mga tawo, an ha Filistia, ngan an didto ha Tiro;

⁸ pati an Asiria ha ira tinmampo, upod an kan Lot kusgan nga mga tawo.

⁹ An ginbuhat mo han mga Medianitanhon, ngadto ha ira imo man liwat pagbubuhaton; ngan amo gihapon ngadto kan Sisera, ngan kan Jabin ha salog Kison buhata.

¹⁰ Imo didto ha Endor ginpirde hira, an ira mga lawas nadunot ha tuna.

¹¹ Buhata ngadto han mga puno nira, sugad ha kan Oreb ug Zeeb nga duha. Dag-a an ngatanan nga punoan nira, sugad han buhat mo kan Seba ug Salmuna.

¹² Nga nagsiring, “Aangkonon namon an tuna, nga kanan Dyos ginhimo ngan gintag-iya.”

¹³ Dyos ko, itugot hin pagpasarang ha ira, sugad hin tapotapo hinin tuna; masugad hira han mga uhot ug upa, nga han hangin ginpapalidpalid la.

¹⁴ Sugad hin kalayo nga nakakaugtang, han mga kabukiran ug kagurangan.

¹⁵ Han imo alipuros hira imo tabogon, han makusog nga hangin imo hira hadlokon.

¹⁶ Magtabon unta hin kaawod, Ginoo, itugot nga magtug-an hira ha imo.

¹⁷ Pirdeha ngan hadloka ha kadayonan, hingpit nga kaalo an ira kamatyan.

¹⁸ Kumilala unta hira nga ikaw la an Ginoo, waray na gud iba; an Dyos an Gilalabawi nga punoan, nga hadi han ngatanan nga kalibutan.