Mga Salmo 71 - Samarenyo Meaning-Based Bible (1984)

Nag-ampo in Tigurang

¹ Ginoo, talwas ako dida ha imo; ayaw gud ipapirde ako!

² Buligi ngan bawia ako, kay matadong ka. Pamatii ngan talwasa ako!

³ Magin marig-on ka nga akon salipdanan, ngan marig-on nga kuta nga arayopan pagsalipod ha akon; ikaw an akon arayopan ngan panalipod.

⁴ Bawia ako, O Dyos ko, tikang han magraot nga mga tawo, tikang han gahom han magbangis ngan yawan-on nga mga tawo.

⁵ Nalaom ako ha imo gudla, O Ginoo nga Dyos; sinmarig ako ha imo tikang han bata pa ako.

⁶ Tinmapod ako ha imo ha bug-os ko nga kinabuhi; pinanalipdan mo ako tikang pa han akon katawo; dayuday pagdadayawon ko ikaw!

⁷ Nagin urosahon ha kadam-an an akon kinabuhi, kundi ikaw an akon makusog nga nananalipod.

⁸ Gindadayaw ko ikaw ha bug-os nga adlaw, ngan ginsasangyaw an imo kaanyag.

⁹ Ayaw ako isikway yana nga tigurang na ako; ayaw ako pabay-i yana nga maluya na ako!

¹⁰ Karuyag ako patayon han akon mga kaaway; nagsasarabot ngan naglalarang hira hin malingoon kontra ha akon.

¹¹ Nasiring hira, “Ginpabay-an na hiya han Dyos; bukora ngan dakpa ta hiya, kay waray na matabang ha iya!”

¹² Ayaw gad pagpahirayo hin duro, O Dyos; buligi ako yana, O Dyos ko!

¹³ Mapirde ngan malaglag unta adton mga nagtitimaraot ha akon! Mahiubos ngan maalohan unta adton mga nagtitinguha paghibang ha akon!

¹⁴ Dayuday gud ikaw an akon paglalaoman; magtitidugang la an akon pagdayaw ha imo.

¹⁵ Igsusumat ko an imo pagkamatadong; maghihimangraw ako ha bug-os nga adlaw han imo katalwasan, bisan kon labaw ito han akon masasabtan.

¹⁶ Dadayawon ko an imo gahom, O Ginoo nga Dyos; igsasangyaw ko an imo gudla pagkamatadong.

¹⁷ Gintutdoan mo ako tikang pa han akon kabatan-on, ngan iginsusumat ko pa gihapon an imo urosahon nga mga buhat.

¹⁸ Ayaw ako pagpabay-i, O Dyos, yana nga tigurang na ako ngan mabusag na an ako buhok! Updi ako samtang iginsasangyaw ko an imo gahom ngan kusog ha ngatanan nga katulinan nga tiarabot.

¹⁹ Naabot ha kalangitan an imo pagkamatadong, O Dyos. Nagbuhat ka hin dagko nga mga butang; waray na gud masugad ha imo!

²⁰ Ginpadad-an mo ako hin mga kakurian ngan pag-antos, kundi ipapahiuli mo an akon kusog; babawion mo ako tikang han lubnganan.

²¹ Padadarudakoon mo an akon dungog, pagliliawon mo na liwat ako.

²² Pagdadayawon ko gud ikaw upod han arpa; pagdadayawon ko an imo kamatinumanon, O Dyos ko. Magtotokar ako ha akon arpa hin mga himno ha imo, an Baraan nga Uusa ha Israel.

²³ Magoliat ako hin kalipay samtang nagtotokar ako ha imo; magkakanta ako upod han akon bug-os nga kalag, kay gintalwas mo ako.

²⁴ Maghihimangraw ako ha bug-os nga adlaw han imo pagkamatadong, kay napirde ngan naalohan na adton mga nagtinguha hin paghibang ha akon.