Mga Salmo 51 - Samarenyo Meaning-Based Bible (1984)

Pag-ampo hin Pangaro hin Pasaylo

¹ Kalooyi gad ako, O Dyos, tungod han imo dayuday nga paghigugma. Tungod han imo dako nga pagkalooy paraa an akon mga sala!

² Hugasi an ngatanan ko nga karat-an ngan linisi ako han akon sala!

³ Hinbabaroan ko an akon mga pagtalapas; hinsasabtan ko permi an akon mga sala.

⁴ Nakasala ako ha imo—ha imo gudla, ngan ginbuhat ko an maraot ha imo atubangan. Sanglit matadong an imo paghukom ha akon; ngan waray sayop an imo paghatag hin sirot.

⁵ Maraot ako tikang pa han akon katawo; makasasala ako nga daan tikang pa han iginbuburod pa la ako.

⁶ Pagkatangkod ug kamatuoran an imo ginkikinahanglan; pun-a an akon hunahuna han imo kinaadman.

⁷ Kuhaa an akon sala, ngan magmamalinis ako; hugasi ako, ngan magmamabusag ako labaw pa hin gapas.

⁸ Pabatia ako han mga tingog hin kalipay ngan pagrayhak; ngan bisan kon gindugmok mo ako magmamalipayon ako gihapon.

⁹ Piyonga an imo mga mata ha akon mga sala ngan paraa an ngatanan ko nga karat-an.

¹⁰ Linisi an akon kasingkasing, O Dyos, ngan pagbag-ohi ako hin mapinadayonon nga espiritu.

¹¹ Ayaw ako isikway ha imo atubangan, ngan ayaw kuhaa ha akon an imo baraan nga espiritu.

¹² Ipahioli ha akon an kalipay han imo katalwasan, ngan andama ako hin pagsugot ha imo.

¹³ Niyan an mga makasasala pagtututdoan ko han imo mga paagi, ngan mabalik hira ha imo.

¹⁴ O Dyos nga akon magtaralwas, bawia ako han sala han pagpatay, ngan igsasangyaw ko nga malipayon an imo pagkamatadong.

¹⁵ Buligi ako pagyakan, O Ginoo, ngan pagdadayawon ko ikaw.

¹⁶ Diri ka naruruyag hin mga tinubod nga unong, kay ighahalad ko unta ini; diri ka nalilipay hin mga tinubod nga halad.

¹⁷ An akon halad amo in usa nga mapinaubsanon nga espiritu, O Dyos; diri mo pagtatamayon in mapinaubsanon nga nagbabasol nga kasingkasing.

¹⁸ O Dyos, kalooyi an Sion ha imo maupay nga kaburut-on ngan buligi hiya; pag-ayda an mga pader han Jerusalem.

¹⁹ Niyan malilipay ka han angay nga mga halad ngan han amon mga tinubod nga halad; ngan ighahalad in mga baka ha imo halaran.