Mga Salmo 5 - Samarenyo Meaning-Based Bible (1984)

Pag-ampo hin Pagpanalipod

¹ Dungga an akon mga pulong, O Ginoo, ngan pamatii an akon mga pangaraba.

² Pamatii an akon pagtawag hin pakibulig, o hadi ko ngan Dyos ko! Ha imo ako nag-aampo.

³ Ha kaagahon dinudungog mo an akon tingog; ha pagsirang han adlaw naghahalad ako han akon pag-ampo ngan hinuhulat ko an imo baton.

⁴ Usa ka nga Dyos nga diri nalilipay han maraot nga binuhatan; diri ka natugot hin karat-an ha imo atubangan.

⁵ Nangangalas ka pagtan-aw han mga magpahitas-on; Napupungtan mo an ngatanan nga magburuhat hin magraot.

⁶ Ginpupuo mo an ngatanan nga mga buwaon ngan gintatamay an mga magpintas ngan mga maglimbong.

⁷ Kundi tungod han imo dako nga gugma makakasulod ako ngadto ha imo balay; Makakasingba ako ha imo baraan nga Templo ngan mayukbo ako pagtahod ha imo.

⁸ Ginoo, damo gud an akon mga kaaway! Mandoi ako hin pagbuhat han imo kabubut-on; himoa nga matadong an imo dalan nga akon pagsusundon.

⁹ Diri gud kasasarigan an pulong han akon mga kaaway; an ira la karuyag amo an pagpatay. Manamit ngan matam-is an ira mga pulong, kundi puno gud ini hin makamaratay nga limbong.

¹⁰ Paghukmi ngan siroti hira, O Dyos; magdara unta han ira pagkapukan an ira kalugaringon nga magraot nga mga tinguha. Paiwasa hira ha imo atubangan tungod han damo nira nga mga sala, ngan han ira pagsupil ha imo.

¹¹ Kundi magkakalipay an ngatanan nga gintalwas mo; dayuday makakagkanta hira hin kalipay. Panalipdi adton mga nahigugma ha imo; tungod ha imo malipayon gud hira.

¹² Bendisyoni adton mga magsinugtanon ha imo, O Ginoo; nananalipod ha ira an imo gugma sugad hin taming.