Mga Salmo 4 - Samarenyo Meaning-Based Bible (1984)

Pakitabang nga Pag-ampo ha Gab-i

¹ Batona ako ha akon pag-ampo, O Dyos nga akon mananalipod! Ginbuligan mo ako dida han akon kakurian. Kalooyi ako yana ngan pamatii an akon pag-ampo.

² Tubtob san-o pa an iyo pagtamay ha akon, kamo nga mga tawo? Tubtob san-o an iyo pagkinaruyag han buwa ngan waray pulos nga mga pulong?

³ Hibaroi nga ginpili han Ginoo an mga magtadong para ha iya ngahaw, ngan pinamamatian niya ako kon nagsasangpit ako ha iya.

⁴ Kahadlok ngan undang na pagpinakasala; paghunahunaa ini hin maupay kon ha mamingaw napahuway ka.

⁵ Ighalad ngadto ha Ginoo an angay nga mga halad, ngan sarigi hiya hin matuod.

⁶ Damo an mga nag-aampo, “Hatagi kami hin damo nga mga kaupayan, O Ginoo. Siplati kami han imo pagkalooy!”

⁷ Kundi an kalipay nga imo iginhatag ha akon darudamo pa gud kay han ira makakarawat upod han ngatanan nira nga pagkaon ug bino.

⁸ Ha akon pagpahuway, nakaturog ako ha kalinaw; kay ikaw la, O Ginoo, an nagmamangno ha akon.