Mga Salmo 3 - Samarenyo Meaning-Based Bible (1984)

Pakitabang nga Pag-ampo ha Aga

¹ Damo, O Ginoo, an akon mga kaaway, damo gud kaupay an nakontra ha akon!

² Nagyayakan hira hiunong ha akon ngan nasiring, “Diri gud hiya bubuligan han Dyos.”

³ Kundi ikaw, O Ginoo, an akon panalipod tikang han kataragman; tinatagan mo ako hin pagdarag-an ngan pinapahiuli mo an akon kusog.

⁴ Ha Ginoo nagtawag ako hin tambulig, ngan iya ako ginbaton tikang han iya baraan nga bukid.

⁵ Nahigda ako ngan nakaturog, ngan ha bug-os nga gab-i pinananalipdan ako han Ginoo.

⁶ Diri ako nahahadlok han yinukot-yukot nga mga kaaway nga nagpapalibot ha akon.

⁷ Kadi, O Ginoo! O Dyos ko, talwasa ako! Kastigoha an ngatanan ko nga mga kaaway ngan ayaw na hira tugoti hin pagdaot ha akon.

⁸ An katalwason natikang han Ginoo— pagbendisyonan unta niya an iya katawhan.