Mga Salmo 29 - Samarenyo Meaning-Based Bible (1984)

May Tingog han Ginoo dida han Bagyo

¹ Dayawa an Ginoo, ha langit kagamhanan, an iya gahom ngan an kahimayaan;

² Dayawa an iya matahom nga ngaran, Singbaha niyo an Usa nga Baraan.

³ Ha dagat hibabatian an Ginoo, nagdadalugdog an gamhanan nga Dyos ko; an dako niya nga aningal hinbatian, ha bawbaw han hiluag nga kalalawdan.

⁴ An dalugdog nga tingog han Dyos hinbatian, ha bug-os nga kusog ug kahimayaan;

⁵ Tungod han tingog, mga sidro napukan, bisan mga sidro nga ha Libano tikang.

⁶ Mga bukid ha Libano ginpalukso, daw mga nati nga baka nga nasoso; linmukso liwat an Bukid Hermon, pareho hin todo nga baka pagkit-on.

⁷ Kinmikidlat tungod han Ginoo nga tingog, ngan an mga kamingawan nagkabay-og;

⁸ Bisan ngani an Kades nga kamingawan, nabay-og nga waray na hitupngan.

⁹ Nabari an mga sanga han kakahoyan, ngan nataktak an mga kadahonan; ha paggoliat ha Templo han ngatanan, “Ngadto han Dyos, Ginoo an kadungganan.”

¹⁰ Naghahadi an Ginoo ha kadayonan, hadi han higlarom nga mga katubigan;

¹¹ Iya katawhan hin kusog tinagan, hin kalinaw hira ginbendisyonan.