Mga Salmo 18 - Samarenyo Meaning-Based Bible (1984)

Kanta han Pagdarag-an ni David

¹ Pagkadako han akon gugma ha imo, kay ikaw an panalipod ko, Ginoo!

² An Ginoo an naalinsakob ha akon, makusog nga arayopan ngan madig-on. An Dyos an akon sinasalirongan, kon upod ha iya waray kahadlokan. Sukad hin taming iya ako sinasalipdan, ngan dida ha iya waray kabarak-an.

³ Dayawon an Ginoo nga gintawag nakon, kay ha mga kaaway ako tatalwason.

⁴ Nag-aalirong ha akon an kamatayon; balod han kapukan linmapwas ha akon.

⁵ An pagkamatay aanhi man ha akon; han lubnganan hi ako kakarawaton.

⁶ Ha kakurian, gintawag ko an Ginoo; ginsangpit ko hiya nga buligan ako. Didto ha templo iya ako ginbaton, namati hiya han pakibulig nakon.

⁷ Nabay-og ug nangurog an katunaan, ngan an patukoranan han kabukiran. Nangutak, nag-abogabog an ngatanan tungod kay an Dyos may-ada nasinahan.

⁸ Ha iya irong imalisbok an aso, ha baba, bangga nga baga ug kalayo.

⁹ Linmusad hiya han kabuksi han langit; lukop an tiil hin dampog nga mangitngit.

¹⁰ Pakoan nga binuhat iya ginsakyan, hinmanoy hiya ha pako han kahanginan.

¹¹ Natahoban hiya han kasisidman; tubigon nga dampog hiya ginlibotan.

¹² Ha iya atubangan kikidlat tinmikang, hin dagko nga bato hin yelo sinundan. Hin mga lamrag hin kalayo inopdan, inmagi ha madakmol nga kadampogan.

¹³ An Ginoo ha langit an dinmalogdog, hinsabtan kanan Gilalabawi tingog.

¹⁴ Iya pinamana, kaaway ginsarang, tungod han kikidlat hira nanadlagan.

¹⁵ Nahidayag an salad han kadagatan, ngan patukoranan han tuna nabuksan; ha pagsaway han kaaway mo, Ginoo, ngan tungod hin kasina ginnguroban mo.

¹⁶ An Ginoo tikang ha mga kahitas-an, tinmamod hiya ngan iya ako kinaptan; ngan iya ako ginbutong hin paggawad, tikang kanan tubig hilarom nga salad.

¹⁷ Hiya an nagtalwas, nagbawi ha akon, ha mga gamhanan nga kaaway gahom; ug ha ngatanan nga akon kasina, para ha akon mga kusgan gud hira.

¹⁸ Sinmulong hira ha akon kakurian, kundi han Ginoo ako ginsalipdan.

¹⁹ Gintalwas ako niya ha kataragman, tungod kay hiya an akon ginlipayan.

²⁰ Mabalos an Ginoo han akon kamatadong, kay waray sala, iya ako dadayawon.

²¹ An balaod han Ginoo akon ginsugot, han akon Dyos waray ako tumalikod.

²² An ngatanan nga balaod akon gintuman, sugad man an iya mga pagturon-an;

²³ Nga waray ako sala, hiya maaram, ug an sayop akon binabayaan.

²⁴ Matadong ko nga buhat binabalos niya, kay maaram hiya waray ako sala.

²⁵ Matinumanon ka hadton nagtutuman, hadton mga hingpit hatag mo kaupayan.

²⁶ Malinis ka para han mga maglinis, kundi maisog ka para han maglaris;

²⁷ Gintatalwas mo an mapinaubsanon, ginpapaubos an mapinahitas-on.

²⁸ Hin kalamrag imo ako tinatagan, ginkukuha mo an akon kasisidman;

²⁹ Kusog hin pagsulong imo akon tinatagan, ngan gahom pagbungkag han salipdanan.

³⁰ Pagkahingpit han kanan Dyos binuhatan; an iya mga pulong katataporan! Usa nga taming itatanding ha iya, hadton iya panalipod nangingita.

³¹ An Ginoo gud la an Dyos, waray iba, an Dyos gud la amo an panalipod ta.

³² Hiya an Dyos nga ha akon nagpadig-on, ug nagbabantay ha akon paglakaton.

³³ Ginpadig-on ako daw tiil hin bugsok, ha kabukiran waray ko kahadlok.

³⁴ Pakig-away gintutdoan ako niya, basi magamit ko an madig-on nga pana.

³⁵ Ikaw an nasalipod ha akon, Ginoo, ngan nagtatalwas ha akon hin tutoo; nakapakusog ha akon an panimangno, ug pagbantay ha akon han gahom nimo.

³⁶ Waray mo itugot nga ako hidakpan, ngan hin kapukan, diri ako maaram;

³⁷ Akon mga kaaway akon ginbukod; waray ako hunong tubtob nga madaog.

³⁸ Hira ginhahanpak ko ngan nagkatumba, ha atubangan ko nadaog ko hira.

³⁹ Nahatag ka hin kusog ha pag-awayan, kon han kaaway ko, an pagdarag-an.

⁴⁰ Mga kaaway ko tinatabog nimo, an magdumot ha akon imo ginpupuo.

⁴¹ Nagsasangpit hira nga imo buligan, kundi waray ihatag an katalwasan; an Ginoo an ira gintitinawag, kundi waray gud ha ira gumagad.

⁴² Akon hira gindudugmok gud hin pino, sugad han ginpapalid nga tapotapo; ngan akon hira gintatamaktamakan, pareho hin lapok ha kakalsadahan.

⁴³ Tikang hin masupilon gud nga katawhan, imo ako gindid-an hin katalwasan; pinapaghadi mo ako hin katawhan, hin diri kilala ko nga ginsakopan.

⁴⁴ Mga lumalangyaw ha akon atubangan, nayukbo ug nasugot han akon yakan;

⁴⁵ Han ira kaisog hira nawawad-an, nakurog tikang ha ira salipdanan.

⁴⁶ Ginoo nga Dyos mabuhi ka hin dayon, akon panalipod hiya pagdayawon; Igsasangyaw gud an iya kagamhanan, an naghatag ha akon hin katalwasan.

⁴⁷ Iya ako gintatagan hin pagdarag-an, supak han nakontra ha akon ngatanan; iya ginsasakop an akon kanasoran,

⁴⁸ Gintalwas ako ha akon kaaway man. Imo ako ginpadaog, O Ginoo, Kontra gud hadton mga kaaway ko; ngan ginpanalipdan pa gud ako nimo, tikang hadton magpintas nga mga tawo.

⁴⁹ Sanglit ako man nagdadayaw ha imo, dida ha butnga hini nga mga tawo; ngan akon ta kamo pagkakantahan, mga kanta hin pagdayaw han imo ngaran.

⁵⁰ Ginpadaog gud han Dyos an iya hadi, ginpakita in gugma han iya ginpili; ngadto kan David nga iya gindihogan, ngan ha iya tulin ha kadayonan.