Mga Salmo 17 - Samarenyo Meaning-Based Bible (1984)

Nag-ampo an Inosente nga Tawo

¹ Pamatii, O Ginoo, an akon matadong nga pangamuyo; tagda an akon pagtawag hin pakibulig! Pamatii an akon pag-ampo, kay waray limbong dinhe ha akon.

² Maghuhukom ka dapig ha akon, kay maaram ka han matadong.

³ Maaram ka han akon kasingkasing; dinuduaw mo ako ha kagab-ihon. Gin-usisa mo ako hin hingpit ngan waray mo hin-agian nga maraot nga ungara didi ha akon; diri ako nagyayakan hin maraot

⁴ sugad han binubuhat han iba; Ginsugot ko an imo sugo ngan waray ako magsunod han agianan han pagraogdaog.

⁵ Naglakat ako pirme ha imo dalan ngan waray sumimang tikang hito.

⁶ Nag-aampo ako ha imo, O Dyos, kay nabaton ka ha akon; sanglit lingia gadman ako ngan pamatii an akon mga pulong.

⁷ Magtaralwas, ipadayag an imo urusahon nga gugma; ha imo kilid talwas kami tikang han amon mga kaaway.

⁸ Salipdi ako, sugad gud han pagpanalipod mo han imo gud mga mata; tagoa ako dida han lambong han imo mga pako,

⁹ tikang han mga atake han mga magraot. Ginlilibotan ako han akon mga kaaway nga puno hin pagdumot;

¹⁰ waray nira kalooy ngan nagyayakan hira hin mapahitas-on.

¹¹ Yana ginpapalibotan ako nira bisan diin ako aatubang naghuhulat la hin higayon pagpukan ha akon.

¹² Sugad hira hin mga liyon nga karuyag maghunothunot ha akon, sugad hin batan-on nga mga liyon nga naghuhulat ha akon ha ira mga taragoan.

¹³ Kadi, O Ginoo, asdangi an akon mga kaaway ngan dag-a hira! Talwasa ako tikang han mga magraot pinaagi han imo ispada;

¹⁴ talwasa ako tikang ha ira pinaagi han imo gahom, tikang hadton may-ada han ngatanan nga ira karuyag hini nga kinabuhi. Siroti hira han mga pag-antos nga imo igin-andam para ha ira; mamay-ada unta igo nga mga pag-antos para han ira mga anak, ngan mga salin pa para han mga anak han ira mga anak!

¹⁵ Igkikita ko ikaw, kay matadong ako, ngan ha akon pagmata, lilipayon ako han imo pakigkaupod.