Mga Salmo 15 - Samarenyo Meaning-Based Bible (1984)

An Ginkikinahanglan han Dyos

¹ Hin-o an makakasulod nga mga tawo, Ginoo, han imo baraan nga templo? Hin-o man ha imo in mag-aataman ha Sion, an imo bukid nga baraan?

² An tawo la nga han Dyos masinugtanon, ha ngatanan nga butang diri masuson; ngan dayuday nagbubuhat hin matadong, matuod ug angkod iya mga pulong,

³ an diri nayubit pagtamay han iba, diri nagdadaot kasangkayan niya, diri napasarang hin sumat nga buwa, ha mga kaamyaw, kahigrani niya.

⁴ An nasikway han Dyos iya sinusosnan, an masinugtanon ginpapasidunggan; iya mga saad pirme gintutuman, bisan pa madako iya kabaraydan.

⁵ Tungod hin kalooy hiya napautang, hin mga patubo waray kinahanglan; ngan diri gud hiya nga nahuhukipan, pagtestigo kontra han diri salaan. Adton magbuhat hini nga mga butang, aada pirme hin waray kahadlokan.