Mga Salmo 148 - Samarenyo Meaning-Based Bible (1984)

Nagtawag han Uniberso hin Pagdayaw han Ginoo

¹ Pagdayawa, pagdayawa an Ginoo! Tikang ha langit dayawa an Ginoo; kamo ngatanan nga nag-uokoy didto, didto han kahitas-an ngatanan kamo.

² Pagdayawa gud hiya niyo ngatanan, kamo nga iya mga kaangelisan. Ngan dayawa man hiya niyo ngatanan, nga iya langitnon nga kasondalohan.

³ Pagdayawa hiya, adlaw ngan han bulan, pagdayawa, magpawa nga kabiton-an.

⁴ Dayawa, gihitaasi'ng kalangitan, ngan an igbaw han langit nga katubigan.

⁵ Papagdayawa an binuhat ngatanan, padayawa han kanan Ginoo ngaran! Kay nagsugo hiya ha iya pagyakan, ngan nahimo hira nga iya ginlarang.

⁶ Ha iya ngahaw nga pagsugo, pagyakan, ini nga mga binuhat nanhimutang. Ha ira mga dapit nga kadayonan, ngan diri na hira makakalaris man.

⁷ Dayawa'n Ginoo tikang katunaan, kamanampan ha dagat ngan kahiladman.

⁸ Linti, uran yelo, esno, kadampogan, kabagyohan, iya sugo gintutuman.

⁹ Pagdayawa hiya, pungtod, kabukiran, prutas nga kakahoyan ngan kagurangan.

¹⁰ Hayop, layaw nga kamanampan ngatanan, adton mga halad ngan an katamsihan.

¹¹ Dawaya h'ya, tanan hadi ngan katawhan, tanan nga prinsipe ngan mga punoan.

¹² An kadaragan-an ngan kaolitawhan, mga tigurang ngan mga kabataan.

¹³ Papagdayawa niyo hira ngatanan, padayawa han kanan Ginoo ngaran. Iya ngaran labaw gudman han ngatanan, gahom n'ya igbaw han tuna, kalangitan.

¹⁴ Adton iya nasod iya ginparig-on, bas' han iya katawhan h'ya pagdayawon. Katawhan Israel iya higugmaon. Pagdayawon an Ginoo, pagdayawon.