Mga Salmo 143 - Samarenyo Meaning-Based Bible (1984)

Nag-ampo hin Pakibulig

¹ O Ginoo, pamatii an akon pag-ampo, dungga an akon pakimalooy ha imo. Ha imo kamatadong, dungga an akon panginyupo, ha imo kamatinumanon, batona intawon ako.

² Ayaw na ako pagsarihi intawon, ako, an ubos mo nga surugoon. Ha imo atubangan waray tawo nga matadong.

³ Ha akon mga kaaway ako gindudumtan, hingpit gud an akon pagkapukan. Ginpriso ha masirom nga bilanggoan, daw patay ako hin kamaihaan.

⁴ Sanglit andam ako hin pagtubyan, kay tugob ako hin damo nga kasamokan.

⁵ An naglabay nga panahon ikaw hinumdoman, sugad man an ngatanan mo nga binuhatan. Makuri ko gud ini hingalimtan.

⁶ Binabayaw ko an mga kamot nakon, nasangpit ha imo nga mainampoon. An akon kalag uraura hin pag-uhawa, sugad hin mamara nga tuna.

⁷ Pamatii na yana ako, Ginoo, hin paglaom nawad-an na ako. Ha akon ayaw gad pagtago, bangin ako ha mga patay mahitampo.

⁸ Pahanumdoma ako ha ikinaaga, han imo waray pagkabalhin nga gugma. Naglalaom ako nga pamatian mo an akon pag-ampo, ipakita an dalan diin ako mapasingadto.

⁹ Nadangop ako ha imo hin panalipod, Ginoo, ha akon mga kaaway talwasa ako.

¹⁰ Ikaw an Dyos nakon, tutdoi ako han imo kaburut-on. Ipakita ha akon an imo kamaupay, dida ha dalan ikaw ha akon magtugway.

¹¹ Sumala han saad mo, Ginoo, ako bawia, ha imo kalooy, ha akon kasamokan talwasa.

¹² Tungod kay imo ako hinihigugma, an akon mga kaaway pamataya. Kay imo man ako surugoon, imo pagpuohon an maraogdaog ha akon.