Mga Salmo 140 - Samarenyo Meaning-Based Bible (1984)

Nag-ampo hin Panalipod

¹ Talwasa ako intawon, O Ginoo, tikang hadton magraot nga mga tawo; ha mga magbangis nga tawo ako ipahirayo.

² Dayuday hira naglalarang hin karat-an, dayuday nag-aaghat hira hin kasamokan.

³ Mga dila nira baga hin magpintas nga kahalasan, mga pulong nira daw hara hin ibingan.

⁴ O Ginoo, imo ako panalipdan, tikang han kanan magraot nga kagamhanan. Talwasa ako han magbangis nga katawhan, nga naglalarang han akon pagkapukan.

⁵ Nagbitik ha akon an mga parayawan, hin pukot ako ira ginbitaran. Ngan ginbutang nira hirani han dalan, in damo nga bitik basi ako hidakpan.

⁶ “Dyos ko ikaw,” nasiring ako ha Ginoo, O Ginoo, pamatii an akon pangamuyo; nga natawag, nasangpit han tambulig nimo,

⁷ Ginoo nga Dyos, makusog nga akon darangpan, sinasalipdan mo ako ha pag-awayan.

⁸ O Ginoo, ayaw gad ihatag, ha mga magraot an ira karuyag; pakyasa an ira mga paglarang!

⁹ An akon mga kaaway diri gad tugotan, nga maangkon nira an pagdarag-an; adton mga tarhog ha ira umumban.

¹⁰ An mga kalayo nga baga mahulog ha ira, manhiluong unta hira ngan diri na makaguwa.

¹¹ Diri unta umuswag an nagsumbong hin buwa, an magbangis nga mga tawo mapuo na hira.

¹² Ginoo, maaram ako nga daan, nga an mga kablas imo inuugopan. Ngan imo man liwat pinananalipdan, adton kanan kablas mga katungdanan.

¹³ Adton magtadong manggad nga mga tawo, magdadayaw ha imo hin tutoo; ngan mag-uokoy ha atubangan nimo.