Mga Salmo 12 - Samarenyo Meaning-Based Bible (1984)

Pag-ampo hin Pakibulig

¹ Tabangi kamo, O Ginoo! Kay waray na gud nahibilin nga maupay nga tawo; ngan waray na gud hiaagian nga tangkod nga mga tawo.

² Nagbibinuwaay hira ngatanan; hin pag-ulog-ulog naglilinimbongay hira.

³ Pahiloma, O Ginoo, an mga dila nga nag-ulog-ulog ha imo! Takpi an mga baba nga naghihinambog hin pagsiring,

⁴ “Pinaagi han amon mga pulong, kukuhaon namon an amon karuyag. Yayaknon namon an amon hingyap, ngan waray makakapugong ha amon.”

⁵ “Kundi maabot gud ako,” nasiring an Ginoo, “Kay ginraraogdaog an mga kablas ngan nag-aaraba an mga ginpapakurian. Tatagan ko hira han katalwasan nga ira ginhihingyap.”

⁶ Masasarigan an mga iginsaad han Ginoo; pareho hin katinuod han salapi nga ginpurog hin makapito didto ha hudnoan.

⁷ Panalipdi kami, O Ginoo, bantayi kami tikang hini nga magraot nga mga tawo.

⁸ Aada ha ngatanan nga dapit an mga magraot, ngan an karat-an amo an gindadayaw nira.