Mga Salmo 118 - Samarenyo Meaning-Based Bible (1984)

Nag-ampo hin Pasalamat tungod han Kadaogan

¹ Pasalamati'n Ginoo, maupay h'ya, kadayonan gud an iya paghigugma.

² An katawhan han Israel pagpasidnga, “Kadayonan gud an iya paghigugma.”

³ Adton kapadian han Dyos pagpasidnga, “Kadayonan gud an iya paghigugma.”

⁴ Tanan nga nahadlok ha iya pasidnga, “Kadayonan gud an iya paghigugma.”

⁵ Ha butnga han akon mga pagkagupong, an Ginoo amo an gintawag nakon; ngan iya man ako gihapon ginbaton, ngan hiya gud adton nagtalwas ha akon.

⁶ Diri ak' mahadlok, upod ko'n Ginoo, ano'n mahihimo ha akon han tawo?

⁷ Nabulig gud ha akon adton Ginoo, hikikit-an ko'n kaaway nga pirdedo.

⁸ Mas maupay an pagsarig han Ginoo, kay hin pagtapod gudla han mga tawo.

⁹ Gabay an Ginoo amo'n sarigan ko, kay hin tawhanon la nga mga pangulo.

¹⁰ Damo'n kaaway in naglibot ha akon, kundi nabungkag ko han kanan Dyos gahom!

¹¹ Ginlibotan nira'n tanan ligid nakon, kundi ginbungkag ko han kanan Dyos gahom!

¹² Daw hin mga buyog ako giblibotan, kundi nasunog dayon daw kakugonan; tungod han kanan Ginoo kagamhanan, akon hira nagkabubungkag ngatanan.

¹³ Ginpiit gud ako haros mapirde na, kundi an Ginoo ha ak' binmulig pa.

¹⁴ Gahom, kusog ginhatagan ako niya, ngan amo gud an magtaralwas ko hiya.

¹⁵ Pamatii an kanta han pagdarag-an, ha mga tulda han kanan Dyos katawhan: “Kanan Ginoo dako nga kagamhanan amo'n nakagbuhat hini gud ngatanan.”

¹⁶ Inin iya ngahaw nga pagkagamhanan an nagdara ha aton hin pagdarag-an; gamhanan nga kamot han Ginoo gudman nagpadaog ha at' dit' ha pag-awayan.

¹⁷ Di' gud mamamatay, mabubuhi ako, magsusumat kanan Ginoo nahimo.

¹⁸ Gintiupay ako niya hin kastigo, kundi waray tugot nga mamatay ako.

¹⁹ Abrihe ha akon an porta han Templo, bas' sumulod pagdayaw han Ginoo ko!

²⁰ Amo ini portahan han Ginoo, an magtadong la an makakasakob hito!

²¹ Nagdadayaw ako ha imo, Ginoo, kay ak' pinamatian ngan ginbaton mo, kay hin pagdarag-an gintagan mo ako, ngan nahimo ka gud nga magtaralwas ko!

²² Bato nga ginsikway han panday ngatanan, nahimo nga ulo nga patukoranan.

²³ Kanan Ginoo gud ini binuhatan, pagkadako hito nga kahiburongan!

²⁴ Ini'n adlaw han pagdaog han Ginoo, pagkalipay kit' ngan magsaurog hito!

²⁵ Talwasa kami, talwasa, O Ginoo, tagi'n kagawasan, nahangyo ha imo.

²⁶ An naabot han Dyos unta bendisyonan, an nakanhi ha kanan Ginoo ngaran! Tatagan ka gud namon hin kaupayan, tikang didto han Templo han Ginoo man!

²⁷ Dyos an Ginoo; nagin maupay ha am', an malipay nga pagsaurog tikangan; dara'n mga sanga nga mga dahonan, ngan magmartsa palibot dit' han halaran.

²⁸ Dyos ko ikaw ginpapasalamatan ko, akon igsasangyaw an im' pagkadako.

²⁹ Pasalamati kay maupay'n Ginoo, iya paghigugma kadayonan ito.