Mga Salmo 110 - Samarenyo Meaning-Based Bible (1984)

Gindasig han Ginoo an Iya Pinili nga Hadi

¹ Siring han Ginoo ha akon ginoo, “Didi ikaw lingkod hini'n akon tuo, tubtob hira adton mga kaaway mo himoon ko nga turumbanan gud nimo.”

² Larang han Ginoo, ha Sion matikang an im' hadianon nga pagkagamhanan. Nasiring gud hiya, “Imo paghadian adton imo mga kaaway ngatanan.”

³ Mabulontad pag-away an im' katawhan ha adlaw umasdang ka ha pag-awayan; daw tun-og makadto im' kalalaken-an ha imo ha baraan nga kabukiran.

⁴ Iginsumpa ini ha aton Ginoo, ngan diri gud niya babakwion ito: “Magpapadayon gud an pagkapadi mo, kan Melquisedec padianon nga hugpo.”

⁵ Sapit gudla dida hiton imo tuo aada dayuday hiya nga Ginoo, hiya an magpupukan han kahadian ha adlaw nga may-ada niya napupungtan.

⁶ Adton mga nasod iya paghuhukman, lulub-on hin patay adton pag-awayan; iya pipirdehon adton kahadian ha bug-os han hiluag nga katunaan.

⁷ Tikang hadton sapa ha ligid han dalan, aadto an kanan hadi pag-iimnan; in bag-o nga kusog iya maaangkon, matindog na hiya nga madinaogon.