Mga Salmo 11 - Samarenyo Meaning-Based Bible (1984)

Pagsarig ha Ginoo

¹ Para han akon himyang nga kamutangan, an Ginoo an akon sinasarigan. Kalurong mo nga masiring ka ha akon, “Daw tamsi ha bukid lupad dayon,

² kay an mga pana daan na ginbawog, ha kasisidman han mga magraogdaog.

³ Waray mahihimo han tawo nga buotan, kon an ngatanan magsarang, mapukan.”

⁴ Aada an Ginoo han baraan nga templo, ngan aadto ha langit an iya trono. Nagbabantay hiya han mga katawhan, ngan maaram hiya han ira binuhatan.

⁵ Mga buotan iya gin-uusisa, amo man liwat adton mga maghuka. Kinasingkasing gud an iya kasina, hadton diri han balaod nakilala.

⁶ Iya gindadad-an an mga maghuka hin baga ug asupre nga naglalaga.

⁷ Matadong ngan nahigugma an Ginoo, han mag-upay nga buhat han mga tawo; hira nga magtutuman hini ngatanan, mabubuhi gud ha iya atubangan.