Mga Salmo 108 - Samarenyo Meaning-Based Bible (1984)

Nag-ampo hin Pakibulig kontra hin mga Kaaway

¹ Andam na ako, O Dyos; Andam na gud ako! Magkakanta ngan magdadayaw ako ha imo! Pagmata, O kalag ko!

² Pagmata, akon arpa ngan lira nga sugad hin sista. Pupukawon ko an kaagahon!

³ Magpapasalamat ako ha imo, O Ginoo, ha butnga han mga nasod, Magdadayaw ako ha imo ha butnga han mga tawo!

⁴ Nalapos han kalangitan an imo dayuday nga paghigugma, tubtob ha panganuron an imo kamatinumanon.

⁵ O Dyos, ipahayag ha langit an imo pagkadako, ngan ha bug-os nga tuna an imo gahom!

⁶ Talwasa kami pinaagi han imo kusog; batona an akon pag-ampo, basi mabawi unta an katawhan nga imo hinihigugma.

⁷ Nagsiring an Dyos dida han iya baraan nga arampoan, “Ha pagdarag-an pagbabahinon ko an Siquem, ngan ipanhahatag ha akon katawhan an Kahamub-an han Sucot.

⁸ Akon an Galaad, ngan sugad man an Manases; akon helmet an Efraim, ngan akon hadianon nga tungkod an Juda.

⁹ Kundi gagamiton ko sugad hin palanggana an Moab ngan sugad hin butangan hin sapatos an Edumea. Magoliat ako hin pagdarag-an an kontra han Filistia.”

¹⁰ Hin-o in magdadara ha akon, O Dyos, ngadto han ginparig-on nga syudad? Hin-o in magdadara ha akon ha Edumea?

¹¹ Iginsikway mo na ba kami hin tinuod? Diri ka na ba maupod han amon kasondalohan?

¹² Buligi kami pakiasdang han kaaway, kay kawang la an tambulig hin tawo!

¹³ Magdadaog kita, kon maugop ha aton an Dyos, pipirdehon niya an aton mga kaaway.