Mga Salmo 105 - Samarenyo Meaning-Based Bible (1984)

Nagpasalamat an Iya Katawhan

¹ Pagpasalamati niyo an Ginoo ngan igpasangyaw an iya pagkadako; igpahayag an iya mga nahimo, dida han kanasoran igsumat niyo!

² Pagkantahi hin pagdayaw an Ginoo, sumat nga ur'sahon iya nahimo.

³ Pagkalipay kamo kay iya na kita tanan nga nasingba ha iya magrakya.

⁴ Dangop ha Ginoo nga kamo buligan, ngan magsingba ha iya hin kadayonan;

⁵ ngan angay gud niyo nga paghinumdoman mga buhat niya nga kahiburongan. Hinumdomi an iya mga milagro, ngan mga paghukom nga iya nahimo;

⁶ tulin ni Abraham nga iya ginsugo, ngan tulin ni Jacob pinili nga tawo.

⁷ Amo hiya an aton Dyos nga Ginoo, para han ngatanan iya mga sugo.

⁸ Gintutuman niya iya ginsaaran, mga saad 'ya yukot nga katulinan.

⁹ Tutumanon iya sabot kan Abraham, ngan an iya saad ngadto kan Isaac.

¹⁰ May ginsaaran an Ginoo kan Jacob, an ginsaaran nga magpapadayon gud.

¹¹ Siring niya, “Ikaw an akon tatagan han bug-os nga katunaan han Canaan; ini magigin imo kalugaringon, sugad nga imo gud ini panurondon.”

¹² Mga tawo han Dyos bisan gutiay la, mga langya la ha Canaan nga tuna.

¹³ Ha mga nasod nagsudoysudoy hira, mga ginhadian hinngadtoan nira.

¹⁴ Waray hiya tugot hira pagdaoton, sanglit mga hadi 'ya ginpahimatngon:

¹⁵ “Di' paglabtan akon mga dinihogan, mga manaragna ko di' paghukaan.”

¹⁶ Ira nasod gindad-an niya hin gutom, ginkuha an tanan nira nga pagkaon.

¹⁷ Kundi ginpauna niya in batan-on, hi Jose nga ginbaligya nga oripon.

¹⁸ Mga tiil niya an ginkadinahan, ngan an iya liog hin puthaw ginhigtan.

¹⁹ Tubtob nga an iya gintagna matuman, an pulong han Ginoo ginpamatud-an.

²⁰ Hadi han Ehipto h'ya ginpabuhian, gintalwas h'ya han hadi han kanasoran.

²¹ Hiya ginhimo nga amo'n tinaporan, han iya gobyerno, iya kagamhanan.

²² H'ya na'n magburuot han bug-os nga tuna, mga opisyal han hadi ubos niya; mga magsaragdon iya gintatadagan, gintutudoan niya hin kinaadman.

²³ Niyan hi Jacob kinmadto ha Ehipto, ngan didto h'ya hini nga nasod pagpuyo.

²⁴ Ngan didto ginhimo ini han Ginoo, nga magdamo'n anak han 'ya mga tawo. Ngan ginhimo hira didto nga gamhanan, labaw kay han ira kaaway ngatanan.

²⁵ Kundi didto iya katawhan gindumtan, iya mga surugoon ginlimbongan.

²⁶ Iya surugoon nga Moises ginsugo, ngan Aaron nga ginpili ginpakadto;

²⁷ ginbuhat nira'n buhat han Dyos nga dagko, ngan mga milagro didto ha Ehipto.

²⁸ Gindad-an n'ya an tuna hin kasisidman, kundi Ehiptohanon w'ray gud magtuman;

²⁹ ginhimo mga dugo ira kasalogan, ngan ginpatay niya'n tanan kaisdaan.

³⁰ Naluob ira tuna hin kapaklahan, bis' an palasyo'n hadi ira ginsudlan;

³¹ pagsugo han Dyos, langaw ngan kanamokan nagluob gud ha bug-os nga katunaan.

³² Hulog mga yelo saliwan han uran, nga lilinti idlap ha katunaan;

³³ ginrugmok kaigosan ngan urubasan, ngan gintumba'n tanan gud nga kakahoyan.

³⁴ Pagsugo n'ya nagkaabot mga duron, diri gud maihap nga minilyon-milyon;

³⁵ ngatanan nga tanom hini ginpangaon, pati an ngatanan nira nga babrion.

³⁶ Ginpatay n'ya suhag nga kalalaken-an dit' han Ehiptohanon nga kabablayan;

³⁷ mga Israelita iya ginmandoan, nagkalakat dara'n salapi, bulawan. Ngan magkusog ini nga iya katawhan, mag-upay an panlawas nira ngatanan;

³⁸ mga 'hiptohanon hira nahadlokan, ngan nalipay hira nga ira bayaan.

³⁹ Katawhan han Dyos hin dampog ginpandongan, ngan ha gab-i hin kalayo ginlamragan;

⁴⁰ hira nangaro, ginhatag katamsihan, damo nga pagkaon tikang kalangitan.

⁴¹ Ginbuka n'yan bato ngan tubig inmawas, daw hin sapa han kamingawan paglatas;

⁴² baraan nga saad iya hinnumdoman nga't han surugoon n'ya nga hi Abraham.

⁴³ Sanglit ha pagguwa iya ginmandoan, adton pinili gud niya nga katawhan; ngan tungod hin dako gud nga kalipayan, gogliat an ira pagkanta ngatanan.

⁴⁴ Iya ginhatag ha ira'n katunaan, nga tuna nga kanan iba nga katawhan; katapos iya gud hira gintugotan, nga magtag-iya hadton ira kaumhan.

⁴⁵ Ginbuhat n'ya ini basi an katawhan, managsugot han iya kabalaoran; ngan an iya mga sugo tumanon man, pagdayawon an Ginoo han ngatanan!