Mga Salmo 102 - Samarenyo Meaning-Based Bible (1984)

An Pag-ampo hin Tawo Nga May Kasamokan

¹ Ginoo, pamatii an akon mga pag-ampo, ngan dungga an pakibulig ko ha imo.

² Ayaw gad intawon talikdi ako, kon han kasamokan ako mapupuno. Pamatii ngan ha gilayon batona ako.

³ Naaanaw ako sugad hin aso, nauugtang an akon lawas ha kalayo.

⁴ Naturaw na ako daw banwa nga uga, ha akon pagkaon waray na ako gana.

⁵ Dako hin duro an akon pangaraba, magasa na gud ako, panit, tul-an na la.

⁶ Daw tamsi nga layaw didto ha kamingawan, daw bukaw didto hin rinuba nga binayaan.

⁷ Ha akon paghigda, waray ko pagpiyong, daw nag-uusaan nga tamsi ha atop han bobong.

⁸ Ha bug-os nga adlaw diri gud nahunong, an mga kaaway pagyubit ha akon; hira ha akon magbibiaybiay an akon ngaran ginamit hin pagtamay.

⁹ Mga agbon amo an akon pagkaon, sinaktan hin luha an akon irinmon.

¹⁰ Tungod han kapungot mo ug kasinahon, ginpurot mo ako ngan ginlabog dayon.

¹¹ Daw lambong ha gab-i an kinabuhi nakon, sugad ako hin banwa nga uga an mga dahon.

¹² Kundi ikaw, Ginoo, hadi nga dayon, mga katulinan ha imo manunumdom.

¹³ Ikaw mabangon ngan napaid han Sion, kay inmabot gihapon ini nga panahon; hin paghatag han imo kalooy ha iya, amo na gud ini an igo nga takna.

¹⁴ Minahal hiya han mga surugoon nimo, bisan kon human na hiya mapuo; maloloy-on hira gihapon ha iya, bisan kon ginbayaan hiya nga guba.

¹⁵ Mahahadlok han Ginoo an kanasoran, ngan han iya gahom adton kahadian.

¹⁶ Kon tindogon na an Sion nga bungto, ipapadayag an iya pagkadako.

¹⁷ Iya na gud nga pamamatian, adton ginpabay-an nga iya katawhan. Diri na gud niya pagpapakabungolan, adton ira mga pag-ampo ngatanan.

¹⁸ Isurat kanan Ginoo binuhatan, para han tiarabot nga katulinan; basi an waray pa matawo nga katawhan, ha iya man liwat magdayaw ngatanan.

¹⁹ An tuna han Ginoo gintinangboan, tikang hadton dapit niya nga baraan; tikang didto dayuday niya ginkikinitaan, an tuna ha ubos han mga katawhan.

²⁰ Tungod nga karuyag niya hibatian, mga araba didto ha bilanggoan; pagtalwas gud hadton mga sinirotan, han kamatayon nga ira dadangatan.

²¹ Ipasangyaw ha Sion an ngaran han Ginoo, magdayaw ha Jerusalem an mga tawo.

²² Kon an mga nasod ug ginhadian magtampo, ngan magsingba na gud hira han Ginoo.

²³ Ginpaluya ako ha akon pagkabatan-on, ginpahalipot niya an kinabuhi nakon.

²⁴ Ayaw anay, Dyos ko, ako pagkuhaa, samtang nga an akon panuigon bata pa. O Ginoo, buhi ka ha kadayonan,

²⁵ ginhimo an tuna ha kamaihaan; ngan pinaagi han mga kamot nimo, imo pa an kalangitan ginhimo.

²⁶ Ngatanan maaanaw kundi magpapadayon ka, sugad hin panapton madudumog hira; sugad hin dugnit imo liliwanan, mauubos manta kawara ngatanan.

²⁷ Kundi amo ka gihapon, waray kataposan.

²⁸ Murayaw an kahimtang han amon kabataan; mag-uokoy dayuday ira katulinan, ha ubos han imo panalipdanan.