Mga Salmo 10 - Samarenyo Meaning-Based Bible (1984)

Pag-ampo para hin Hustisya

¹ O Ginoo, ano nga hirayo ka man, Ngan natago ha takna hin kakurian?

² Gindaot an kablas han mapahitas-on, ha ira mga bitik, hira dadakpon.

³ Naghahambog adton maraot nga tawo, tungod han magraot nga iya mga gusto; nagtatamay ngan nasikway han Ginoo, adton mga tawo nga halot hin duro.

⁴ Yawan-on nga tawo diri nagdidipara, mahitungod hadto nga Ginoo niya; ha iya parayaw naghunahuna, nga an Dyos ha iya waray hinungdan la.

⁵ Adton yawan-on nagmamainuswagon ngan ngatanan niya nga buruhaton. Diri masabot han kanan Dyos paghukom, han iya mga kaaway mayubiton.

⁶ Nasiring hiya ha iya kalugaringon, “Diri manta ako nga pagkawangon; ngan diri gud nakon hingangadtoan, hin bisan ano nga mga kakurian.”

⁷ Puno hin pagdaot an iya pamulong, mga panarhog ug pulong nga buwaon; madagmit magyakan hin madinumtanon, ngan magraot gud iya mga yayaknon.

⁸ Natago hiya ngahaw ha mga baryo, hin paggama hin waray sala nga mga tawo. Didto iya hira ginbibinantayan, basi an makalolooy ira hidakpan.

⁹ Nahulat daw liyon ha iya tagoan, an kablas iya gud ginbibinantayan; basi mahibitik niya, tinagan hin paon; ngan kon mabitik, iya pagdadanason.

¹⁰ An magpakalolooy nahirugmok na, tungod hin kakusog, ginpirde na hira.

¹¹ Siring hin maraot, “Dyos diri nadipara, napiyong man hiya, diri gud nakita.”

¹² O Ginoo, an magraot kastigoha, an mga nag-aantos, ayaw limota.

¹³ Unanhon pagtamay han Dyos han magraot, ngan masiring, “Diri an Dyos nasirot”?

¹⁴ Sayod ka han kasamok ug kakurian, ngan pirme ka gud la andam hin pagtabang. An makalolooy ha imo natubyan; an kablas pirme nimo ginbubuligan.

¹⁵ Utda an gahom han magbangis nga tawo, ngan mga matinalapasnon ha imo; mga sayop nira tagi hin kastigo, tubtob nga diri na magbuhat hin otro.

¹⁶ An Ginoo hadi nga waray katubtoban, nagpadayon hin waray kataposan. An nasingba hin lain nga kadiyosan, maaanaw gud ha iya katunaan.

¹⁷ Pamatii, Ginoo, an mga pag-ampo han mapainubsanon nga mga tawo; tagi ini nga mga tawo han kadasig nimo,

¹⁸ ngan pamatii an ira pangamuyo. Sugad man han ginraogdaog ug ilo, para ha ira kaupayan an paghukom nimo; basi an mga tawo nga aanhi pa ha tuna, diri makahatag hin kahadlok ha ira.