Mga Maghurukom 4 - Samarenyo Meaning-Based Bible (1984)

Ginpadara hi Debora ug Barac

¹ Han kamatay ni Ehud, nakasala na liwat han Ginoo an mga tawo han Israel.

² Sanglit itinugot han Ginoo nga mabihag hira ni Jabin, usa nga Canaanhon nga hadi nga naghadi ha syudad han Hasor. An pangulo han iya kasondalohan amo hi Sisera nga nag-ukoy didto ha Haroset.

³ May-ada hi Jabin 900 nga mga karuwahe nga hinimo hin puthaw, ngan maisog ug manaogdaog hiya nga hadi han mga tawo han Israel sulod hin 20 ka tuig. Niyan nagsangpit an mga tawo han Israel han Ginoo hin pakibulig.

⁴ Hadto nga panahon an maghurukom han Israel amo hi Debora, nga asawa ni Lapidot, ngan usa hiya nga manaragna.

⁵ Batasan niya an paglingkod ha puno hin usa nga palmera nga kahoy butnga han Rama ug Betel didto han sagkahon nga nasod han Efraim, ngan didto hito nga dapit napakadto ha iya an mga tawo han Israel hin pagpatuhay ha iya.

⁶ Usa ka adlaw ginpasugoan niya hi Barac nga anak ni Abinoam, nga taga syudad han Cades ha Neftali ngan ginsiring niya, “Iginhatag ha imo han Ginoo nga Dyos han Israel ini nga sugo: ‘Kuha hin 10,000 nga mga tawo tikang han mga tribo nira Neftali ug Zabulon ngan dad-a hira ngadto ha Bukid Tabor.

⁷ Dadad-on ko hi Sisera nga pangulo han kasondalohan ni Jabin hin pakig-away ha imo didto han Salog Cison. May-ada niya mga karuwahe ngan mga sondalo, kundi padadag-on ko ikaw kontra ha iya.’”

⁸ Niyan binmaton hi Barac, “Makadto ako kon umupod ka ha akon, kundi kon diri ka umupod, diri man ako makadto.”

⁹ Binmaton hi Debora, “Hala, maupod ako ha imo, kundi diri ka gud makarawat hin dungog han pagdarag-an, kay itutubyan han Ginoo hi Sisera ngadto hin usa nga babaye.” Sanglit inmupod hi Debora kan Barac ngadto ha Cades.

¹⁰ Gintawag ni Barac ngadto ha Cades an mga tribo nira Zabulon ug Neftali, ngan sinmunod ha iya in 10,000 nga mga tawo. Inmupod ha iya hi Debora.

¹¹ Hini nga panahon gintindog ni Heber nga Kenitanhon an iya tulda duok ha Cades nga hirani han tuog nga kahoy didto ha Zaananim. Pinmahirayo hiya han iba nga mga Kenitanhon nga mga tulin ni Hobab nga bayaw ni Moises.

¹² Han paghibaro ni Sisera nga sinmagka hi Barac han Bukid Tabor,

¹³ gintirok niya an iya 900 nga puthaw nga mga karuwahe ngan an ngatanan niya nga mga tawo, ngan ginpadara hira tikang ha Haroset ngadto han Salog Cison.

¹⁴ Niyan nagsiring hi Debora kan Barac, “Lakat na! Nag-uuna ha imo an Ginoo! Yana nga adlaw iginhatag ha imo an pagdarag-an kontra kan Sisera.” Sanglit linmugsong hi Barac tikang ha Bukid Tabor upod an iya 10,000 nga mga tawo.

¹⁵ Han pagsulong ni Barac upod an iya kasondalohan, ginlisang han Ginoo hi Sisera upod an ngatanan niya nga mga karuwahe ngan mga tawo. Hinmaw-as hi Sisera han iya karuwahe ngan pinmalagiw nga baktas.

¹⁶ Ginbukod ni Barac an mga karuwahe ngan an kasondalohan ngadto ha Haroset, ngan pinamatay an ngatanan nga kasondalohan ni Sisera. Waray gud tawo nga nahisalin.

¹⁷ Kinmalagiw hi Sisera ngadto han tulda ni Jael nga asawa ni Heber nga Kenitanhon, kay sangkay man han panimalay ni Heber hi Hadi Jabin han Hasor.

¹⁸ Ginmawas hi Jael hin pagtapo kan Sisera ngan nagsiring ha iya, “Dayon ngan sulod han akon tulda. Ayaw kahadlok.” Sanglit sinmulod hiya ngan gintago hiya ni Jael ha luyo hin usa nga biray.

¹⁹ Nagsiring hiya kan Jael, “Paimna gad ako hin tubig, kay inuuhaw ako.” Gin-abrehan niya an anit nga surudlan hin gatas, ginpainom hiya, ngan gintago na liwat hiya.

²⁰ Niyan ginsiring niya hi Jael, “Tindog didto ha porta han tulda, ngan kon may umabot ngan pumakiana ha imo kon may tawo dinhe, sidnga nga waray.”

²¹ Guol hin duro hi Sisera nga nahingaturog hiya hin maupay. Niyan kinmuha hi Jael hin martilyo ngan hin usa nga talibugsok hin tulda, naghinayhinay hiya ngadto kan Sisera, ngan ginpatay hiya pinaagi hin pagtudsoka han iya ulo han talibugsok lahos ngadto ha tuna.

²² Han pag-abot ni Barac nga namimiling kan Sisera, ginmawas hi Jael hin pagtapo ha iya ngan nagsiring ha iya, “Kadi! Ipakikita ko ha imo an tawo nga imo ginbibiling.” Sanglit sinmulod hiya upod kan Jael, ngan nakadto ha tuna hi Sisera nga patay na, nga natahos han iya ulo an talibugsok.

²³ Hito nga adlaw ginpadaog han Dyos an mga Israelita kontra kan Jabin nga Canaanhon nga Hadi.

²⁴ Ginpakurian gud hiya nira ngada han kamatay niya.