Mga Maghurukom 21 - Samarenyo Meaning-Based Bible (1984)

Tinagan hin Kaasaw-an an mga Benjaminhon

¹ Han pagkatirok han mga Israelita didto ha Mispa, nagsumpa hira han Ginoo: “Waray ha amon matugot hin usa nga Benjaminhon nga mangasawa hin usa han amon anak nga babaye.”

² Sanglit kinmadto ha Betel an mga tawo han Israel ngan didto nagkalingkod hira ha atubangan han Dyos ngada han pagkagab-i. Nagtinangis hira kay tugob hira hin kabido.

³ “O Ginoo nga Dyos han Israel, kay ano nga nahinabo ini? Kay ano nga haros na mapara ha Israel an tribo ni Benjamin?”

⁴ Temprano pa han pagkaaga nagkabuhat an mga tawo ngan nagtindog hin altar. Naghalad hira hin mga halad hin pagkaurosa ngan hin mga halad nga tinubod.

⁵ Nagpakiana hira, “May-ada ba hugpo tikang han ngatanan nga mga tribo han Israel nga waray kumadto han katirok ha atubangan han Ginoo didto ha Mispa?” (Nagsumpa hira nga papatayon an bisan hin-o nga waray kumadto ha Mispa.)

⁶ Nabido an mga tawo han Israel tungod han ira kabugtoan nga mga Benjaminhon ngan nagsiring, “Yana nga adlaw nawad-an an Israel hin usa han iya mga tribo.

⁷ Ano an aton bubuhaton hin paghatag hin kaasaw-an han nahisalin nga kalalaken-an han Benjamin? Nagsumpa kita han Ginoo nga diri naton ighahatag ha ira in bisan usa han aton mga anak nga kababayen-an.”

⁸ Han pagpakiana nira kon may-ada hugpo tikang han mga tribo han Israel nga waray makadto han katirok didto ha Mispa, hinbaroan nira nga waray usa nga taga-Habes didto ha Galaad nga kinmadto;

⁹ han pagpundoka han mga tawo waray didto taga-Habes.

¹⁰ Sanglit ginsugo han bungto in 12,000 han ira gimamag-isogi nga mga tawo ngan gintugon hira, “Kadtoa ngan pamataya niyo an ngatanan nga mga tawo didto ha Habes, lakip an kababayen-an ug kabataan.

¹¹ Pamataya an ngatanan nga kalalaken-an ngan an ngatanan nga kababayen-an nga diri na uray.”

¹² Hin-agian nira in 400 nga batan-on nga mga uray nga kababayen-an dida han mga tawo ha Habes, sanglit ira gindara ini hira ngadto han kampo didto ha Silo nga aadto ha tuna han Canaan.

¹³ Niyan nagpatugon an bug-os nga bungto ngadto han mga Benjaminhon nga nakadto ha Bato ni Rimon ngan andam hira hin pagtapos na han araway.

¹⁴ Binmalik an mga Benjaminhon, ngan iginhatag ha ira han iba nga mga Israelita an taga-Habes nga kababayen-an nga waray nira pamataya. Kundi an kadamo waray makasukol ha ira.

¹⁵ Nabido an mga tawo tungod han mga Benjaminhon kay ginbungkag han Ginoo an pagkaurosa han mga tribo han Israel.

¹⁶ Sanglit nagsiring an mga pangulo han bungto, “Waray na kababayen-an ha tribo ni Benjamin. Ano an aton bubuhaton basi makahatag kita hin kababayen-an nga aasawahon han mga kalalaken-an nga nahisalin?

¹⁷ Kinahanglan diri mawad-an an Israel hin usa han iya dose nga mga tribo. Kinahanglan mangita kita hin paagi nga mabuhi an tribo ni Benjamin,

¹⁸ kundi diri kita makakatugot ha ira hin pangasawa han aton mga anak nga kababayen-an, kay aton na gintunglo an bisan hin-o nga tumugot hin usa nga Benjaminhon hin pangasawa hin usa han aton mga anak nga kababayen-an.”

¹⁹ Niyan naghunahuna hira, “Maabot na an ikinatuig nga pyesta han Ginoo didto ha Silo.” (Amihanan an Silo han Betel, timogan han Lebona, ngan sinirangan han dalan nga butnga han Betel ug Siquem.)

²⁰ Ginsiring nira an mga Benjaminhon, “Pakadto ngan panago kamo didto han mga urubasan

²¹ ngan pagbantay kamo. Kon magkagawas na an kababayen-an han Silo hin pagsayaw ha panahon han pyesta, pagkagawas liwat kamo tikang han mga urubasan. An kada usa ha iyo magkuha hin babaye nga iya aasawahon ngan dad-a hira niyo kon mangoli na kamo ngadto han katunaan han Benjamin.

²² Kon kumadto ha iyo hin pagbawi an ira mga amay o kabugtoan nga kalalaken-an, sidnga hira niyo, ‘Tugoti gad kami hin pag-asawa ha ira kay waray man namon hira bihaga didto ha pag-awayan. Ngan tungod kay waray man hira ihatag niyo ha amon, diri kamo nakakasala hin pagsupak han iyo saad.’”

²³ Ginbuhat ini han mga Benjaminhon; nagpili hin asawa an kada usa ha ira tikang han kababayen-an nga sinmayaw didto ha Silo ngan ira gindara. Niyan binmalik hira ngadto han ira kalugaringon nga katunaan, gintindog hin utro an ira mga bungto, ngan nag-ukoy hira didto.

²⁴ Ha amo ngahaw nga panahon nagkalakat an iba nga mga Israelita, ngan binmalik an kada tawo ngadto han iya kalugaringon nga tuna.

²⁵ Waray hadi didto ha Israel hadto nga panahon. Nagbuhat an kada tawo han bisan ano nga iya karuyag.