Mga Maghurukom 17 - Samarenyo Meaning-Based Bible (1984)

Naghimo hin mga Diyosdiyos hi Miqueas

¹ May-ada hadto usa ka tawo nga ginngaranan kan Miqueas, nga nag-ukoy didto han sagkahon nga nasod han Efraim.

² Ginsiring niya an iroy niya, “Han pagkawata ha imo han 1,100 ka bug-os nga salapi, gintunglo mo an mga tawo. Hinbatian ko ikaw han pagbuhat mo hini. Kitaa, aadi ha akon an kwarta. Ako an nagkuha hini.” Nagsiring an iroy niya, “Bendisyonan ka unta han Ginoo, anak ko!”

³ Igin-oli niya an kwarta ngadto han iroy niya ngan nagsiring an iroy niya, “Basi diri mahingadto han akon anak an pagtunglo, akon ighahalad an salapi ngadto han Ginoo. Gagamiton ini hin paghimo hin diyosdiyos nga kahoy nga pinutos hin salapi.”

⁴ Niyan iginbalik liwat han anak an salapi ngadto han iroy niya. Kinuha niya in 200 ka bug-os han salapi ngan iginhatag ini han platero nga naghimo hin usa nga diyosdiyos nga kahoy ngan ginputos ini han salapi. Iginbutang ini didto han balay ni Miqueas.

⁵ May-ada kalugaringon nga dapit hin pagsingba ini nga tawo nga hi Miqueas. Naghimo hiya hin mga diyosdiyos ngan hin usa nga efod, ngan gintudlok niya nga padi in usa han iya mga anak nga kalalaken-an.

⁶ Waray hadi didto ha Israel hito nga panahon; nagbuhat an kada tawo han bisan ano nga iya karuyag.

⁷ Hito ngahaw nga panahon may-ada usa nga batan-on nga Levita nga nag-ukoy anay didto han bungto han Betlehem ha Juda.

⁸ Binmaya hiya han Betlehem hin pagbiling hin lain nga urokyan. Han naglilinakat hiya, nahingadto hiya han balay ni Miqueas, didto han sagkahon nga nasod han Efraim.

⁹ Ginpakianhan hiya ni Miqueas, “Taga diin ka?” Binmaton hiya, “Usa ako nga Levita nga taga-Betlehem han Juda. Namimiling ako hin dapit nga akon uokyan.”

¹⁰ Nagsiring hi Miqueas, “Pabilin dinhe ha akon. Hihimoon ko ikaw nga akon magsaragdon ug padi, ngan tatagan ko ikaw hin napulo ka bug-os nga salapi kada tuig, mga panapton, ngan imo pagkaon.”

¹¹ Inmuyon an batan-on nga Levita hin pagpabilin upod kan Miqueas ngan nahimo hiya nga sugad hin usa han iya mga anak.

¹² Gintudlok hiya nga padi ni Miqueas ngan nag-ukoy hiya didto han balay ni Miqueas.

¹³ Nagsiring hi Miqueas, “Yana nga may-ada ko na Levita nga akon padi, maaram ako nga pagpapakaupayon na ako han Ginoo.”