Mga Darahonon 8 - Samarenyo Meaning-Based Bible (1984)

Gindayaw an Kinaadman

¹ Pamati! Nagtatawag an Kinaadman. Naggogoliat an Pagsabot!

² Natindog hiya ha bawbaw han kapungtoran hirani han dalan ngan dida han ginsasang-an han mga dalan.

³ Nagtatawag hiya dida han mga aragian ngadto han syudad, ha ligid han mga ganghaan:

⁴ “O katawhan, naghahangyo ako ha iyo; nagtatawag ako han ngatanan dinhe ha tuna.

⁵ Mga tapang ba kamo? Pag-admi an pagkamaaram. Mga lurong ba kamo? Pag-admi an pagkamay-ada buot.

⁶ Pamatii an akon mag-upay nga mga pulong; matadong an ngatanan nga iginsusumat ko ha iyo.

⁷ An akon iginyayakan amo an kamatuoran; nakapupungot ha akon an mga buwa.

⁸ Matuod an ngatanan nga akon igyayakan; waray hini buwa o paglipatlipat.

⁹ Klaro ini ngatanan ngadto han tawo nga may kaaram; yano ini kaupay ngadto han mga nanhibaro.

¹⁰ Pilia an akon tugon, diri an salapi; pilia an hibaro, diri an mahal nga bulawan.

¹¹ “Amo ako an Kinaadman, labaw pa ako kay hin mga alahas; diri makakatanding ha akon an bisan ano nga ungara nimo.

¹² Amo ako an Kinaadman, ngan may-ada ko pagsabot; may-ada ko hibaro ngan maupay nga paghukom.

¹³ An pagtahod han Ginoo amo an pagdumot han maraot; napupungtan ko an kamapinahitas-on ngan an kamalabyaw, pati an magraot nga mga paagi ngan buwa nga mga pulong.

¹⁴ Naglalarang ako ngan akon ini gintutuman. May-ada ko pagsabot ngan makusog ako.

¹⁵ Binubuligan ko in kahadian hin paghadi, ngan in mga punoan hin paghimo hin mag-upay nga mga balaod.

¹⁶ Nangungulo an kada punoan ha tuna tungod han akon tambulig, an mga magbaralaod ngan harangdon nga mga tawo.

¹⁷ Hinihigugma ko adton mga nahigugma ha akon; makakaagi ha akon an bisan hin-o nga namimiling ha akon.

¹⁸ May-ada ko iharatag nga karikohan ngan kadungganan, kahuraan ngan kauswagan.

¹⁹ An imo makukuha ha akon larulabaw pa kay han mahal nga bulawan, kay han tunay nga salapi.

²⁰ Naglalakat ako ha dalan han pagkamatadong; ginsusulsog ko an mga aragian han katadongan,

²¹ nahatag ako hin bahandi ngadto hadton mga nahigugma ha akon, nga ginpupuno ko an ira kabablayan hin mga manggad.

²² “Gintuha ako han Ginoo una han ngatanan, an syahan han iya mga binuhat, ha maiha na nga panahon.

²³ Ginhimo ako hadto ha tinikangan pa gud, dida han syahan, han waray pa paghihimoa an kalibutan.

²⁴ Natawo ako han waray pa an kalalawdan, han waray pa mga burabod hin katubigan.

²⁵ Natawo ako han waray pa an kabukiran, han waray pa igbubutang an kapungtoran,

²⁶ han waray pa an Dyos maghimo han tuna ngan han kaumhan, o bisan han syahan nga kumkom hin tuna.

²⁷ Nakadto ako han pagbutangan niya han kalangitan, han pagdus-oga niya han kasidsiran han langit ngadto ha tabok han kalalawdan,

²⁸ han pagbutangan niya han panganod ha langit, han pag-buksi niya han mga burabod han kalalawdan,

²⁹ ngan han pagsugoa han mga tubig han kadagatan nga diri maglapwas han ira utlanan. Nakadto ako han pagbutangan niya han mga patukoranan han tuna.

³⁰ Sapit ako niya sugad hin parahimo hin plano, ako an iya adlaw-adlaw nga burabod hin kalipay, nga dayuday malipayon ha iya atubangan—

³¹ malipayon dinhe ha kalibutan ngan malipayon dida han mga anak han tawo.

³² “Yana, mga batan-on nga kalalaken-an, pamatii ako niyo. Buhata an akon iginsiring ngan magmamalipayon kamo.

³³ Pamatii an igintutdo ha iyo. Pagmakinaadmananon; ayaw pagpasibay-i ini.

³⁴ Magmamalipayon an tawo nga namamati ha akon— an tawo nga nagbabantay han akon porta ha kada adlaw, nga naghuhulat didto han aragian ngadto han akon urokyan.

³⁵ May-ada kinabuhi an tawo nga makakaagi ha akon, ngan malilipay ha iya an Ginoo.

³⁶ Nagdadaot han iya kalugaringon an tawo nga diri makakaagi ha akon; nahigugma han kamatayon an bisan hin-o nga nagdudumot ha akon.”