Mga Darahonon 6 - Samarenyo Meaning-Based Bible (1984)

Nagdugang pa hin mga Pahimatngon

¹ Anak ko, nagsaad ka ba nga ikaw an mabayad hin kanan iba mga utang?

² Nadakop ka na ba pinaagi han imo kalugaringon nga mga pulong, nabitik pinaagi han imo kalugaringon nga mga saad?

³ Kon sugad, anak ko, aada ka ha gahom hito nga tawo, kundi iini in paagi nga makakahimo ka hin paggawas: pagdali ngadto ha iya, ngan hangyoa hiya nga buhian ka.

⁴ Ayaw gud itugot nga mahingaturog ka o nga pumahuway ka.

⁵ Pag-iginagawasan han bitik sugad hin tamsi o hin bugsok nga nalikay tikang hin usa nga parapanganop.

⁶ Kinahanglan mahibaro an hubya nga mga tawo hin mga pagturon-an tikang han mga tubak.

⁷ Waray nira pangulo, pinakalabaw, o punoan,

⁸ kundi, ha panahon han katsirak nagtitirok hira hin ira pagkaon, nga ira pag-andam para han kat-uran.

⁹ Tubtob san-o an paghinigda han hubya nga tawo? San-o pa ba hiya babangon?

¹⁰ “Mapiyong ako hin madaliay,” nasiring hiya; “Makirugtol ako ngan mapahuway la ako anay.”

¹¹ Kundi samtang nakaturog hiya, susulongon hiya han kakablasan nga sugad hin armado nga tikasan.

¹² Nagsusudoysudoy hin pagbinuwa an waray pulos ngan magraogdaog nga mga tawo.

¹³ Nakiro ngan nasenyas hira hin paglipat ha imo,

¹⁴ samtang maraot an ira nahuhunahunaan hin pagpasarang hin kasamokan ha ngatanan nga dapit.

¹⁵ Tungod hini, tigda la nga hahampakon hira hin karat-an, ngan masasamad hira ngan makuri ini matambal.

^16-19 May pipito nga mga butang nga napupungtan han Ginoo ngan dinidiri gud niya: Mapinahitas-on nga paniplat, buwaon nga dila, mga kamot nga napatay hin tawo nga waray sala, hunahuna nga naglalarang hin karat-an, mga tiil nga nagdadagmit hin pagbuhat hin maraot, saksi nga dayuday an pagbinuwa, ngan tawo nga nag-aaghat hin kasamokan dida hin kasangkayan.

Nagpahimatngon kontra hin Panlibog

²⁰ Anak ko, buhata an iginsugo ha imo han imo amay, ngan ayaw gud hingalimti an igintutdo ha imo han imo nanay.

²¹ Dayuday tipigi an ira mga pulong dida han imo kasingkasing.

²² An ira pagturon-an amo an mag-uuna ha imo paglalakton, amo an mananalipod ha imo kon gab-i, ngan magsasagdon ha imo kon adlaw.

²³ Nasilaw nga kapawa an ira mga pagtutdo; nakakatutdo ha imo hin pag-ukoy hin matadong nga kinabuhi an ira pagwaydong.

²⁴ Makakapahirayo ini ha imo tikang han magraot nga kababayen-an, tikang han nakakalukmay nga mga pulong han mga asawa hin iba nga mga lalake.

²⁵ Ayaw pagpasulay han ira kamaghusay; ayaw pagpabitik han ira maglimbong nga mga mata.

²⁶ Mahihimo nga suholan la hin usa ka bug-os nga tinapay an usa nga maraot nga babaye, kundi makakaputo an panlibog.

²⁷ Makakaghabak ka ba hin kalayo nga diri masusunog an imo panapton?

²⁸ Makakaglakat ka ba ha bawbaw hin mga baga nga diri mapapaso an imo mga tiil?

²⁹ Amo ini an mahitatabo kon makigdirig ka han asawa hin iba nga lalake. Mag-aantos an bisan hin-o nga nagbubuhat hini.

³⁰ Diri an mga tawo nagtatamay hin kawatan kon nangangawat hiya hin pagkaon tungod hin kagutom;

³¹ kundi kon hidakpan hiya, kinahanglan magbayad hiya hin pito ka pilo—kinahanglan itubyan niya an ngatanan nga iya hiagi.

³² Kundi waray gud buot an tawo nga nanlilibog. Gindadaot la niya ngahaw an iya kalugaringon.

³³ Pagpapakaalohan ngan paglalatobon hiya; maaalohan hiya ha kadayonan.

³⁴ Uraura gud hin kasina in usa nga bana kon nangangabugho hiya; waray katubtoban an iya pagbulos.

³⁵ Diri gud hiya mapabayad; waray regalo nga makakapahugpoy han iya kasina.