Mga Darahonon 4 - Samarenyo Meaning-Based Bible (1984)

May mga Kaupayan an Kinaadman

¹ Mga anak ko, pamatii an igintutdo ha iyo han iyo amay. Pamati hin maupay ngan makakaangkon kamo hin hibaro.

² Maupay an akon igintututdo ha iyo, sanglit hinumdomi ini ngatanan.

³ Han gutiay pa ako, nga amo la nga lalake nga anak han akon mga kag-anak,

⁴ gintutdoan ako han akon amay. Nagsiring hiya ha akon, “Hinumdomi an akon iginsiring ngan ayaw gud ini hingalimti. Tumana ini, ngan mabubuhi ka.

⁵ Angkona an kinaadman ug an maupay nga pagsabot! Ayaw hingalimti o pagpasibay-i an akon iginsiring.

⁶ Ayaw bayai an kinaadman, ngan pananalipdan ka niya; higugmaa hiya, ngan babantayan ka niya.

⁷ An pakaangkon hin kinaadman amo an gimamaupayi nga butang nga imo mahihimo. Bisan ano pa an imo maangkon, angkona gud an maupay nga pagsabot.

⁸ Higugmaa an kinaadman, ngan pahihitas-on ka niya. Hangkopi hiya ngan papasidunggan ka niya.

⁹ Hiya an imo matahom nga korona ha imo ulo.”

¹⁰ Pamati ha akon, anak ko. Karawta hin kinasingkasing an akon igsusumat ha imo ngan mag-uokoy ka hin hilawig nga kinabuhi.

¹¹ Gintutdoan ko ikaw hin kinaadman ngan hin pagkamatadong ha imo kinabuhi.

¹² Waray makakaulang ha imo kon maglakat ka hin matadong, ngan diri ka mahipapakdol kon dumalagan ka.

¹³ Dayuday hinumdomi an imo gin-adman. Kinabuhi mo an imo hinbaroan—bantayi ini hin maupay.

¹⁴ Ayaw pag-inupod-upod han magraot nga mga tawo. Ayaw pagsunod han susbaranan han mga magraot.

¹⁵ Ayaw buhata ini! Pahirayo tikang han karat-an! Talikdi ini, ngan pagpadayon dida han imo dalan.

¹⁶ Diri nahingangaturog an mga magraogdaog kon diri hira nakakagbuhat hin sayop. Nagmiminata la hira, tubtob nga makahimo hira hin paghuka hin tawo.

¹⁷ An pagkamaraogdaog ngan pagkamaraot amo na an ira pagkaon ug irimnon.

¹⁸ An dalan nga linalaktan han mga magtadong sugad han pagpunias ha kaagahon nga nagtitilamrag an iya kapawa tubtob ha pagsirang han bug-os nga adlaw.

¹⁹ Kundi an dalan han mga magraogdaog sugad han gab-i hin kamasirom. Natutumba hira, kundi diri hira nakakakita han ira nahipakdolan.

²⁰ Anak ko, pamati han akon igsisiring. Pamatii an akon mga pulong.

²¹ Ayaw gud ini pabulaga ha imo. Panumdoma ngan tipigi ini dida ha imo kasingkasing.

²² Mahatag ini hin kinabuhi ngan maupay nga panlawas ha bisan kan kanay nga makakasabot hini.

²³ Bantayi an imo paghunahuna; kay burabod ini han imo kinabuhi.

²⁴ Ayaw gud pagyakan hin bisan ano nga diri matuod. Ayaw gud pag-ungay hin mga buwa ngan hin maglimbong nga mga pulong.

²⁵ Siplat hin matadong upod in tangkod nga pagtapod; ayaw pagtamod hin kaawod.

²⁶ Pag-inoinoha hin maupay an imo pagbubuhaton, ngan magmamainuswagon an bisan ano nga imo pagbubuhaton.

²⁷ Likayi an karat-an ngan tadong ha imo paglakat. Ayaw gud pagsimang han matadong nga dalan.