Mga Darahonon 3 - Samarenyo Meaning-Based Bible (1984)

Nagwaydong han mga Batan-on

¹ Anak ko, ayaw hingalimti an akon igintutdo ha imo. Dayuday hinumdomi an iginpabuhat ko ha imo.

² Mahatag ha imo an akon pagturon-an hin hilawig ngan mainuswagon nga kinabuhi.

³ Ayaw gud bayai an kamaunongon ngan kamatinumanon. Ikwentas ini ha imo liog; isurat ini dida han imo kasingkasing.

⁴ Kon buhaton mo ini, malilipay ha imo an Dyos ngan an tawo.

⁵ Sarigi an Ginoo ha bug-os mo kasingkasing. Ayaw gud pagtapod han imo kamaaram.

⁶ Hinumdomi an Ginoo dida han ngatanan nga imo ginbubuhat, ngan ipakikita niya ha imo an matadong nga paagi.

⁷ Ayaw gud paghunahuna nga maaram ka labaw han imo hinbabaroan; sugta la an Ginoo ngan ayaw pagbuhat hin maraot.

⁸ Kon buhaton mo ini, masusugad ini hin maupay nga bulong nga magtatambal han imo mga samad ngan makakaiban han kamaol-ol han imo kasawdan.

⁹ Pagpasidunggi an Ginoo pinaagi hin paghalad ngadto ha iya han gimamaupayi han ngatanan nga mga abot han imo tuna.

¹⁰ Kon buhaton mo ini, mapupuno hin mga inani nga abot an imo mga buhos, ngan magsasapay hin bino an imo mga surudlan.

¹¹ Anak ko, kon busaan ka han Ginoo, pamati hin maupay ngan karawata ini nga usa nga pahimangno ha imo.

¹² Binubusaan han Ginoo adton iya mga hinihigugma, sugad nga binubusaan hin usa nga amay an iya pinaura nga anak.

¹³ Palaran an tawo nga may-ada kinaadman ngan pagsabot.

¹⁴ Darudamo pa an makukuha hini kay han salapi; marumahal pa ini ha imo kay hin bulawan.

¹⁵ Marumahal pa an kinaadman kay hin mga alahas; waray bisan ano nga butang nga imo minahal in malabaw han kinaadman.

¹⁶ Nahatag ha imo an kinaadman hin hilawig nga kinabuhi, sugad man hin manggad ngan kadungganan.

¹⁷ Nakakalipay han imo kinabuhi an kinaadman, ngan kalinaw ini ha imo paglalaktan.

¹⁸ Malipayon adton diri nabaya han kinaadman ngan an makaangkon ha iya may-ada kinaadman:

¹⁹ Gintuha han Ginoo an tuna pinaagi han iya kinaadman; iginpahimutang niya an langit pinaagi han iya hibaro.

²⁰ Ginpaawas han iya kinaadman an mga salog, ngan ginpauran ha tuna an mga dampog.

²¹ Anak ko, tipigi an imo kinaadman ug pagsabot. Ayaw gud ini ibulag ha imo.

²² Tatagan ka hini hin maupay ngan malipayon nga kinabuhi.

²³ Diri ka mahahadlok ug diri ka kukulbaon ha imo paglalaktan ngan diri ka ngani mahipapakdol.

²⁴ Diri ka mahahadlok ha imo paghigda, ngan makaturog ka nga malinawon ha bug-os nga gab-i.

²⁵ Diri ka mababaraka hiunong hin tigda nga mga karat-an nga naabot sugad hin usa nga bagyo para han mga maghuka nga mga tawo.

²⁶ Pananalipdan ka han Ginoo; diri hiya matugot nga mabitik ka.

²⁷ Kon makakahimo ka, pagbuhat hin maupay hadton mga nagkikinahanglan hini.

²⁸ Ayaw gud pahulata an imo amyaw ngada han pagkabuwas pa, kon makakabulig ka ha iya yana.

²⁹ Ayaw paglarang hin bisan ano nga makakabido han imo amyaw; nag-uokoy hiya sapit ha imo ngan natapod hiya ha imo.

³⁰ Ayaw pakiglantugi bisan kan kanay hin waray la hinungdan, kon waray man ada hiya magbuhat ha imo hin bisan ano nga maraot.

³¹ Ayaw kaawa han mga mag-isog ngan magraogdaog o ayaw pakahunahuna hin pagsubad han ira maraot nga buhat,

³² kay napupungot an Ginoo hadton mga tawo nga nagbubuhat hin maraot, kundi natapod hiya han mga magtadong.

³³ Ginagabaan han Ginoo an mga panimalay han mga magraot, kundi ginpapakaupay niya an mga panimalay han mga magtadong.

³⁴ Para ha iya waray gamit an mga magpinahitas-on, kundi kinalolooyan niya an mga magpinaubsanon.

³⁵ Makakaangkon an mga makinaadmananon hin kadungganan kundi an mga lurong maglulugaring la hin pagdugang han ira kaarawdan.