Mga Darahonon 25 - Samarenyo Meaning-Based Bible (1984)

Dugang pa nga mga Darahonon ni Solomon

¹ Iini pa in mga darahonon ni Solomon nga kinopya hin mga tawo didto han palasyo ni Hadi Ezequias han Juda.

² Kanan Dyos kaburot-on nga diri kita makatukib hin iya mga butang; kanan hadi karuyag nga igsaysay hin dayag an iya hinsabotan nga mga butang.

³ Diri mo gud hinsasabtan an ginhuhunahuna hin usa nga hadi; diri ta matutukib an iya mga panhunahuna, sugad nga diri maaabot an mga kahitas-an han langit o matutugkad an mga kahiladman han kalalawdan.

⁴ Kuhaa an mga hugaw han salapi, ngan makakahimo an platero hin matahom nga butang.

⁵ Ipahirayo han hadi an magraot nga mga magsaragdon, ngan an iya pamunoan mababantogan tungod han iya pagkamatadong.

⁶ Kon aada ka ha atubangan han hadi, ayaw pagpakalalake o pagpakaimportante.

⁷ Mauruupay pa nga pauswagon ka ngadto hin hiruhitaas nga lingkoran kay nga ipahatag an imo dapit ngadto hin darudako nga pagkatawo.

⁸ Ayaw pagdalidali hin pagsumbong ha hukmanan mahitungod han imo hinkit-an. Kon unina hisabotan hin iba nga testigo nga sayop ka, mag-aano ka man?

⁹ Kon ikaw ngan an imo amyaw may kalipongan, kamo nala an pagtuhay hini ngan ayaw ipadayag in bisan ano nga mga sekreto.

¹⁰ Kay kon diri, mahibabaro an ngatanan nga diri ka nakakatipig hin sekreto, ngan diri na gud mabulag ha imo an kaarawdan.

¹¹ In usa nga panhunahuna nga maupay nga kapulong sugad hin sabong nga bulawan nga iginborda dida hin salapi.

¹² An pagpahimangno nga ihinahatag hin tawo nga maaram ngadto hin tawo nga andam hin pamati maromahal pa kay hin mga singsing o alahas nga hinimo han labi ka puraw nga bulawan.

¹³ An katataporan nga sinugo nakakapahalibway han nagsugo ha iya, sugad hin mahagkot nga tubig dida han kapaso han kat-ani.

¹⁴ An mga tawo nga nagsasaad kundi diri gud nagtutuman, sugad hira hin mga dampog ug hangin nga waray dara nga uran.

¹⁵ Tungod hin mailobon nga pagmaymay, madadara nimo bisan an labi kamakusog nga maato ha imo, ngan makakakabig ka pa ngani hin mga punoan.

¹⁶ Ayaw gud pagkaon hin dugos nga lapas na han kasadangan, kay bangin ka magsuka.

¹⁷ Ayaw pakighampang hin agsob han imo kahigrani; bangin sumhan hiya ngan masina ha imo.

¹⁸ An diri matuod nga sumbong sugad kamakamaratay hin espada, balbag, o matarom nga pana.

¹⁹ An imo pagtapod hin tawo nga diri kasasarigan ha panahon hin kakurian sugad hin pagsamsam nga may-ada mo matingotingo nga ngipon o paglakat nga nag-iingka ka.

²⁰ An paglipay hin usa ka tawo nga mabidoon pinaagi han pagkaato, sugad ini hin paglubas ha iya kon mahagkot an panahon o pagbagnos hin asin dida hin iya kasamdan.

²¹ Kon ginugutom na an imo kaaway, pakaona hiya; kon hiya inuuhaw, paimna;

²² makakapaawod ini ha iya hin duro, ngan pagbabaloson ka han Ginoo.

²³ An paglibak nagdadara hin kasina, sugad nga nagdadara hin uran an hangin nga amihan.

²⁴ Mauruupay pa an pag-ukoy didto ha atop hin balay kay hin paglungon hin asawa nga mamugo ug maaringasa.

²⁵ An pakabati hin maupay nga sumat tikang hin hirayo nga tuna sugad hin pag-inom hin mahagkot nga tubig kon pinapasoan ngan inuuhaw ka.

²⁶ An maupay nga tawo nga napadaog hin maraot nga tawo nakakapahinumdom ha imo hin burabod nga nahugawan o atabay nga hiniloan.

²⁷ Diri maupay para ha imo an labis na nga pagkaon hin dugos, sugad man an pagtinguha hin sobra na nga pagdayaw ha imo.

²⁸ Kon diri ka nakakapugong han imo kasina, sugad ka hin kamakalolooy hin syudad nga waray mga pader, nga andam hin pagsulonga.