Mga Darahonon 24 - Samarenyo Meaning-Based Bible (1984)

-19-

¹ Ayaw kaawa hin magraot nga mga tawo ngan ayaw pakigsarangkay ha ira.

² An pagsamok la an ira ginhuhunahuna; ha kada pagyayakan nira, may nauunong nga tawo.

-20-

³ Gintitindog an mga panimalay dida han patukoranan nga kinaadman ug pagsabot.

⁴ Kon may-ada hibaro, sangkap an mga kwarto hin marahalon ngan magtahom nga mga butang.

-21-

⁵ Mauruupay an pagkamakinaadmananon kay han pagkamakusog. Tinuod, labaw ka importante an hibaro kay han kusog.

⁶ Ngani, kinahanglan ka magplano hin maupay san-o ka umatubang ha pag-awayan, ngan kon darudamo an mag-upay nga sagdon nga imo maangkon, darudako man an imo higayon hin pagdaog.

-22-

⁷ Makuri hin duro natukib hin usa nga lurong an mga puplonganon nga makinaadmananon. Waray gud niya sadang ibaton kon importante nga mga butang an ginkakarukayakan.

-23-

⁸ Kon dayuday ka naglalarang hin maraot, mahibabantog ka nga makisasamokon.

⁹ Salaan an bisan ano nga ginlalarang hin usa nga lurong. Nangangalas an mga tawo hin usa ka tawo nga matamay han iba.

-24-

¹⁰ Kon maluya ka ha takna hin kakurian, tinuod nga maluya ka gudman.

-25-

¹¹ Ayaw pag-alang hin pagtalwas hin ginraraogdaog nga tawo nga gin-iiparatay.

¹² Bangin sumiring ka nga waray mo labot hini, kundi maaram an Dyos ngan naghuhukom hiya han imo mga panuyo. Dayuday hiya nagkikita ha imo; maaram hiya hini. Ngan babaloson ka niya sumala han imo ginbubuhat.

-26-

¹³ Anak ko, kaon hin dugos, kay maupay ini para ha imo. Ngan sugad nga matam-is ha imo dila an dugos tikang han balay han putyukan,

¹⁴ masisiguro mo nga maupay an kinaadman para han imo kalag. Angkona ini ngan may-ada ka mapawa nga kabubwason.

-27-

¹⁵ Ayaw pagsubad han mga magraot nga naglalarang hin pagtikas hin tangkod nga tawo o hin pag-agaw han iya puroy-anan.

¹⁶ Bisan makapira katumba in tangkod nga tawo, mabangon liwat hiya dayon. Kundi mapupukan ha kataragman an mga magraot.

-28-

¹⁷ Ayaw pagmalipay kon nahuhulog an imo kaaway ha karat-an ngan ayaw pagrayhak kon nahipapakdol hiya.

¹⁸ Maaram an Ginoo kon naghihiyukat ka ha iya, ngan diri maruruyag hini an Ginoo; ngan bangin diri na lugod hiya pagkastigohon.

-29-

¹⁹ Ayaw kabaraka tungod han magraot nga mga tawo; ayaw kaawa ha ira.

²⁰ Waray kabubwason an maraot nga tawo—waray gud niya sadang paglaoman.

-30-

²¹ Anak ko, tahora an Ginoo, ngan pasidunggi an hadi. Ayaw gud pag-api hin mga tawo nga nasupil ha ira;

²² maghihikaraot in sugad nga mga tawo ha usa la kadali. Maaram ka ba han karat-an nga mahihimo han Dyos o han hadi?

Dugang pa nga mga Puplonganon nga Makinaadmananon

²³ Iginsiring liwat han mga makinaadmananon ini nga mga puplonganon: Sayop para hin usa nga maghurukom nga may niya dinadapigan.

²⁴ Kon paghukman niya nga waray sala in tawo nga salaan, panhihimaraoton hiya ngan pagdudumtan hiya han ngatanan.

²⁵ Kundi an mga maghurukom nga nagkakastigo han salaan, maghihikaupay ngan magpapahimulos hin maupay niya nga bantog.

²⁶ Tigaman hin matuod nga pagkasangkay an tangkod nga baton.

²⁷ Ayaw anay pagbalay ngan pagtukod hin panimalay ngada han kaandam han imo kaumhan, ngan sigurado ka na nga may nimo kabubuhian.

²⁸ Ayaw pagtestigo kontra hin tawo kon waray mo sadang pasikaran, o pagyakan hin malimbongon nga mga butang hiunong ha iya.

²⁹ Ayaw pagsiring, “Bubuhaton ko ha iya sumala han ginbuhat niya ha akon! Bubulson ko hiya.”

³⁰ Linmabay ako han kaumhan ngan mga urubasan hin hubya ngan lurong nga tawo.

³¹ Luob ini hin katungkan ngan higtaas nga kabanwaan. Ruba na an mga pader nga bato palibot han uma.

³² Gintan-aw ko ini, namalangdong ako, ngan hinbaroan ko ini nga pagturon-an:

³³ Hala, pahuway la anay; sigi, katurog la. Kirogtol la ngan pahuway hin madaliay,

³⁴ kundi samtang nakaturog ka, susulongon ka han kakablasan sugad hin armado nga tikasan.