Mga Darahonon 23 - Samarenyo Meaning-Based Bible (1984)

-6-

¹ Kon makigsaro ka hin dako nga pagkatawo, ayaw hingalimot kon hin-o an imo kasaro.

² Pugngi an imo kalugaringon kon may gana ka hin pagkaon.

³ Ayaw kalamot han magrasa nga pagkaon nga iya igindudurot; bangin tuyo la niya hin pagbitik ha imo.

-7-

⁴ Panhunahuna hin maupay nga diri ka maguol hin duro hin pag-irinirikohan.

⁵ Mahihimo mawara an imo kwarta ha usa la kadali, sugad nga tinuboan ini hin pako ngan linmupad sugad hin agila.

-8-

⁶ Ayaw pagkaon ha lamesa hin tawo nga kuripot; o kalamot han magrasa nga pagkaon nga igdudurot niya.

⁷ “Kaon ngan dugang pa,” nasiring hiya, kundi balitaw diri ini ungod-ungod. An iya tinuod nga kinaiya aada ha iya la hunahuna.

⁸ Igsusuka mo an imo ginkaon, ngan makakarag la an ngatanan mo nga pag-ulog-ulog.

-9-

⁹ Ayaw pagyakan nga makakabati in usa nga lurong; diri hiya maruruyag han imo mag-upay nga mga pulong.

-10-

¹⁰ Ayaw gud pagbalhina an kadaan nga pag-ultan o pag-agawa an tuna nga gintatag-iya hin mga ilo.

¹¹ An Ginoo amo an ira makusog nga mananalipod ngan hiya an makikiglantugi ha imo han ira kalipongan.

-11-

¹² Pamatii hin maupay an imo magturutdo ngan pag-aram han ngatanan nga imo mahihimo.

-12-

¹³ Ayaw pag-alang hin pagtadong hin bata. Diri makakamatay ha iya an angay nga paglamba.

¹⁴ Ha kamatuoran, makakatalwas lugod ini han iya kinabuhi.

-13-

¹⁵ Anak ko, kon magmakinaadmananon ka, malilipay gud ako.

¹⁶ Maparayaw gud ako kon hibatian ko ikaw nga nagyayakan hin mga pulong han kinaadman.

-14-

¹⁷ Ayaw kaawa han mga magpakasasala. Himoa nga tinguha han imo kinabuhi an pagtahod han Ginoo.

¹⁸ Kon pagbuhaton mo ini malamrag an imo kabubwason.

-15-

¹⁹ Pamati, anak ko, pagmakinaadmananon, ngan hunahunaa gud hin maupay an imo pag-ukoy dinhe ha tuna.

²⁰ Ayaw pakig-upod-upod hin mga tawo nga labis in pag-ininom ngan pagkinaon.

²¹ Maghihingalooy gayud an mga parahubog ngan mga maglamon. Kon pagkinaon ngan pagkinaturog la an imo pagbuhaton, diri maiha, magbabado ka hin mga trapo.

-16-

²² Pamatii an imo amay; kon diri hiya, diri ka mahihimugso dinhe ha kalibutan. Kon lagas na an imo nanay, ipakita an imo pagdayaw ha iya.

²³ An kamatuoran, kinaadman, paghibaro, ngan maupay nga buot—angay ini paliton, kundi diri ini mahibabaligya kay mahal hin duro para ha imo.

²⁴ May katungdanan hin pagmalipayon an amay hin tawo nga matadong. Makakapahalipay ha imo in anak nga makinaadmananon.

²⁵ Himoa nga malipay an imo tatay ug nanay tungod ha imo. Tagi hito nga kalipay an imo nanay.

-17-

²⁶ Anak ko, pamati hin maupay, ngan himoa an akon kinabuhi nga imo susbaranan.

²⁷ Makamaratay nga bitik an mga babaye nga maraot an dungog ngan maglaw-ay nga kababayen-an.

²⁸ Nagama hira ha imo sugad hin mga tikasan, ngan hira an tinikangan han kamalingoon hin damo nga kalalaken-an.

-18-

^29-30 Ipakita ha akon in tawo nga parahubog, nga natilaw hin maisog nga mga irimnon, ngan ipakikita ko ha imo in tawo nga makalolooy ngan mabidoon, nga samok la an iya biling ngan waray hunong hin pagnginurutob. Magpula an iya mga mata ngan samadsamad hiya nga iya unta ini malilikyan.

³¹ Ayaw itugot nga masulay ka hin bino, bisan kon mapulapula ini ngan nabulang ha imo mga mata, ngan manamit la pagtunlon.

³² Pagkaaga maabat ka sugad hin tinukob ka hin malara nga halas.

³³ Malingaw pa iton imo ulo ngan turad ka pa magyakan.

³⁴ Maabat ka sugad hin aadto ka ha kalalawdan ngan dinadagat ka, nga baga nagdidigwa ka kay karuyag ka magsuka.

³⁵ Niyan masiring ka, “Naigo ada ako, o ginlatob ada ako, kundi diri ako hini nahinunumdom. Kay ano nga diri ako nakakagmata? Kinahanglan ko na liwat in irimnon.”