Mga Darahonon 22 - Samarenyo Meaning-Based Bible (1984)

¹ Kon papilion ka han maupay nga bantog ngan han dako nga karikohan, pilia an maupay nga bantog.

² An mga kablas ngan an mga riko may-ada ginkakausaan: hira nga duha ginhimo han Ginoo.

³ Makita ngan malikay an may buot nga mga tawo han tiarabot nga kasamokan, kundi matapo lugod han kasamokan an tapang nga tawo, ngan ha orhe iya ini pagbabasolan.

⁴ Pagtahora an Ginoo ngan pagmapinaubsanon, ngan maiimo an karikohan, kadungganan, ngan hilawig nga kinabuhi.

⁵ Kon nahigugma ka han imo kinabuhi, likayi an mga bitik dida han dalan nga nagdadakop han magraot nga mga tawo.

⁶ Pagtutdoi an bata nga magmatadong an iya kinabuhi, ngan hinunumdoman ini niya ha bug-os niya nga kinabuhi.

⁷ Mga oripon han riko an mga kablas nga tawo. Pag-utang hin kwarta ngan maooripon ka han tawo nga imo gin-utangan.

⁸ Kon magpugas ka han mga binhe hin diri pagkamatadong, maturok an karat-an ngan diri ka na makakagtalumpigos han iba.

⁹ Pagmahinatagon ngan paangbita an mga kablas han imo pagkaon. Bebendisyonan ka tungod hini.

¹⁰ Ayaw pahirani hin tawo nga mapahitas-on ngan mawawaray na an mga lantugi, pagkaaragway, o pagsinukmatay.

¹¹ Kon naruruyag ka hin kasingkasing nga malinis ngan manamit nga pamulong, an hadi magigin imo sangkay.

¹² Binabantayan han Ginoo nga matipigan an kamatuoran pinaagi han iya panhimuwa han mga pulong han mga buwaon.

¹³ Aadto la ha sakob han balay an tawo nga hubya; nahahadlok hiya nga patayon hiya hin liyon kon hiya gumawas.

¹⁴ Usa nga bitik an mga pulong hin babaye nga parapanlibog—nadadakop hini adton mga napupungtan han Ginoo.

¹⁵ Kinaiya han kabataan an pagbuhat hin tinuyaw ngan binatabata nga mga butang, kundi an angay nga kastigo an makakatutdo ha ira hin pagkamaupay.

¹⁶ Kon magrenegalo ka ha mga riko o magraogdaog ka han mga kablas basi magriko ka, mapopobre ka lugod.

An Traynta nga Makinaadmananon nga mga Puplonganon

¹⁷ Pamati, ngan igtututdo ko ha imo an iginsiring han mga makinaadmananon. Pag-admi an ira mga pagturon-an,

¹⁸ ngan malilipay ka kon hinumdoman ngan masag-ulo mo ini.

¹⁹ Karuyag ko nga sumarig ka han Ginoo; sanglit igsusumat ko ini ha imo yana.

²⁰ Iginsurat ko para ha imo in 30 nga mga puplonganon. Aada hini an hibaro ngan maupay nga sagdon,

²¹ ngan magtututdo ini ha imo kon ano gud an kamatuoran. Niyan kon sugoon ka hin pag-usisa hini, makakahatag ka han tinuod nga baton.

-1-

²² Ayaw singabot han mga kablas tungod la nga makakahimo ka hini; ayaw pahimulosi adton mga makalolooy didto ha hukmanan.

²³ An Ginoo an makikiglantugi para ha ira han ira kalipongan, ngan pagtatarhogon niya an bisan hin-o nga nagtatarhog han ira kinabuhi.

-2-

²⁴ Ayaw pakigsangkay hin mga tawo nga mag-isog ngan uraura hin kapungtanon.

²⁵ Bangin ka makatuon han ira mga batasan ngan diri ka na makakahimo hin pagbaya hini.

-3-

²⁶ Ayaw pagsaad hin pagbayad hin kanan iba mga utang,

²⁷ kay kon diri ka makabayad, kukuhaon nira bisan pa an imo higdaan.

-4-

²⁸ Ayaw gud pagbalhina an kadaan nga pag-ultan nga iginbutang han imo kaapoy-apoyan.

-5-

²⁹ Ipakita ha akon in tawo nga maupay magtuman han iya buruhaton, ngan ipakikita ko ha imo in tawo nga mauruupay kay han kadam-an ngan angay nga kaupod-upod hin kahadian.