Mga Darahonon 21 - Samarenyo Meaning-Based Bible (1984)

¹ Gindudumara han Ginoo an kanan hadi hunahuna, hin sugad kamasayon han iya pagmando han pag-awas hin usa nga sapa.

² Mahihimo maghunahuna ka nga matadong an ngatanan nga imo ginbubuhat, kundi hinumdomi nga an Ginoo amo an naghuhukom han imo mga panuyo.

³ Buhata an matadong ngan maupay; labaw ini nga nakakalipay han Ginoo kay hin paghalad ha iya hin mga tutuboron nga halad.

⁴ Ginbubut-an an mga magraot han ira kamapinahitas-on ngan kamalabyaw, ngan sala ini.

⁵ Paglarang hin maupay ngan magkakamay-ada ka bahandi; kon inapiki an imo buhat maiimo la an kakablasan.

⁶ An karikohan nga naaangkon mo pinaagi hin limbong nawawara dayon; kundi pagdadad-on ka anay hini ngadto ha ganggang han kamatayon.

⁷ Paghuhukman an mga magraot pinaagi han ira kalugaringon nga kamaraogdaog; nadiri hira hin pagbuhat han matadong.

⁸ Baliko an dalan nga ginlalaktan han mga salaan; matadong an ginbubuhat han mga waray sala nga tawo.

⁹ Mauruupay pa an pag-ukoy ha atop hin balay, kay hin pakiglungon hin asawa nga mamugo ngan maaringasa.

¹⁰ An mga magraot dayuday la gutom hin karat-an; waray gud tawo nga ira nalolooyan.

¹¹ Kon kinakastigo an tawo nga mayubiton, bisan an tapang makakakuha dida hini hin pagturon-an. Mahibabaro an makinaadmananon han igintututdo ha iya.

¹² Maaram an matadong nga Dyos han mga nahinanabo didto han mga panimalay han mga magraot ngan iya pagpupukanon hira.

¹³ Kon diri mo pamatian an pakibulig han mga kablas, diri man pamamatian an imo tawag hin pakibulig.

¹⁴ Kon may tawo nga nasisina ha imo, makakapahugpoy ha iya in regalo nga ihinahatag hin sekreto.

¹⁵ Kon binubuhat an katadongan, an mga mag-upay malipayon, kundi an mga magraot nagkakahadlok.

¹⁶ Ginhuhulat han kamatayon an bisan hin-o nga nagpapasagad la ngan diri nagamit han iya maupay nga hunahuna.

¹⁷ An pagpatakas hin kalipayan, bino, ngan marasa nga pagkaon, diri gud makakapariko ha imo.

¹⁸ An mga magraot amo ngahaw an mahiaagom han pag-antos nga ira gintitinguha hin pagdara ngadto han mga buotan.

¹⁹ Mauruupay an pag-ukoy ha kamingawan, kay hin pagtampo hin asawa nga mamugo ngan masuson.

²⁰ Nag-uokoy an mga makinaadmananon ha kahuraan ug karikohan, kundi ginagasto la dayon han mga lurong an kwarta nga ira hin-aagian.

²¹ Pagmaloloy-on ngan ayaw paglimbong ngan mabubuhi ka hin maiha; pagtatahoron ngan pagdudumaraon ka hin maupay han iba.

²² Nakakabihag in listo gud nga heneral hin syudad nga binantayan hin mag-isog nga mga sondalo, ngan nakakarumpag han mga pader nga ira sinasarigan.

²³ Paghiroti an imo ginyayakan, kon buot ka mahigawas hin kasamokan.

²⁴ Ipakita ha akon in mapahitas-on nga tawo, ngan ipakikita ko ha imo in parayawnon, malabyaw ngan diri maaram mag-alagyan nga tawo.

²⁵ Naglulugaring la hin pagpatay ha iya ngahaw an hubya nga tawo, nga nadiri hin pagtrabaho;

²⁶ an iya la binubuhat amo an paghunahuna han mga butang nga iya karuyag maangkon. Kundi mahinatagon an matadong nga tawo ngan huyayag an kasingkasing hin paghatag.

²⁷ Napupungot an Ginoo kon naghahalad ha iya an magraot nga mga tawo, labi na gud kon binubuhat nira ini tikang hin magraot nga mga panuyo.

²⁸ Diri tinutuod an buwaon nga testigo, kundi kinakarawat an pulong hin tawo nga naghuhunahuna anay hin maupay.

²⁹ Natapod ha ira ngahaw an magtadong nga mga tawo, napakamag-isog an mga magraot nga tawo.

³⁰ An kinaadman, an kabaltok, ngan an katarom han hunahuna waray la ini pulos kon nakontra ha imo an Ginoo.

³¹ Makakahimo ka hin pag-andam hin mga kabayo para ha pag-awayan, kundi an Ginoo amo an nahatag hin pagdarag-an.