Mga Darahonon 18 - Samarenyo Meaning-Based Bible (1984)

¹ An mga tawo nga diri nakikig-urosa han iba, naghuhunahuna la han ira kalugaringon; diri hira nauyon han kanan iba hinbabaroan nga matadong.

² Diri nababaraka in usa nga lurong, makasabot hiya o diri; karuyag la niya magpakita nga listo hiya.

³ Diri nagkakabulag an sala ug kaarawdan. Wad-a an imo dungog ngan tatamayon ka.

⁴ An mga pulong hin usa ka tawo mahihimo nga burabod hin kinaadman, nga sugad kahilarom han kalalawdan ngan sugad kamatin-aw hin nag-aawas nga sapa.

⁵ Diri matadong nga ugopan an mga salaan ngan diri pagtagan han ira katadongan adton mga waray sala.

⁶ Kon magtikang hin pakiglantugi in usa nga lurong naungara hiya nga paglatobon hiya.

⁷ Kon nagyayakan in usa nga lurong gindadaot niya an iya kalugaringon; nabibitik hiya dida han iya mga pulong.

⁸ Marasa hin duro an paglinibak—hin kaupay la pagtinulonon!

⁹ An tawo nga hubya sugad ka maraot hin tawo nga parapanruba.

¹⁰ Sugad an Ginoo hin marig-on nga lantawan nga darangpan han mga magtadong basi makalikay hira han karat-an.

¹¹ Kundi naghuhunahuna an mga riko nga pinananalipdan hira han ira manggad sugad hin higtaas ngan magrig-on nga mga pader palibot hin syudad.

¹² Waray tawo nga tinatahod labot kon hiya mapinaubsanon; tipakadto ha pagkapukan an mga magpinahitas-on.

¹³ Pamati anay san-o ka bumaton, kay kon diri, bangin ka pagpakaalohan ngan sidngon ka nga lurong.

¹⁴ An imo tinguha nga mabuhi ka makakapalaksi ha imo kon may nimo sakit, kundi kon mawara an imo tinguha, waray na an imo paglaom.

¹⁵ Dayuday naruruyag ngan andam hin pag-aram an masinabuton nga mga tawo.

¹⁶ Karuyag mo ba makigkita hin dako nga pagkatawo? Magmamasayon la ini kon dad-an mo hiya hin regalo.

¹⁷ Daw pirme matadong an una magyakan didto ha hukmanan, tubtob hin pagpakianhi ha iya han iya kontra.

¹⁸ Kon nagkakasupak didto ha hukmanan in magkasi gamhanan, an pagripa an makakagtuhay han ginkakalipongan.

¹⁹ Buligi an imo bugto ngan pananalipdan ka niya sugad hin marig-on nga pader hin syudad, kundi kon makig-away ka ha iya, diri ka na pauuswagon niya ha iya balay.

²⁰ Kinahanglan mabuhi ka bisan ano an imo dangatan tungod han imo ginyinakan.

²¹ Makakabuhi o makakamatay ha imo an imo ginyayakan, sanglit kinahanglan andam ka hin pagkarawat han imo dadangatan tungod han imo mga pulong.

²² Hiya nga nakakaagi hin asawa, nakakaagi hin maupay nga butang; nagpapakita ini nga maupay ha iya an Ginoo.

²³ Kon nagyayakan an pobre nga tawo kinahanglan nga magmatinahoron hiya, kundi maisog an riko kon hiya nabaton.

²⁴ May mga pagkasangkay nga diri nag-iiha; kundi may-ada kasangkayan nga mas maunongon pa kay hin kabugtoan.