Mga Darahonon 11 - Samarenyo Meaning-Based Bible (1984)

¹ Napupungtan han Ginoo an mga tawo nga nagamit hin diri tuptop nga mga timbangan. Timbangan nga tuptop amo an iya nalilipayan.

² Maaalohan dayon an mga tawo nga magpinahitas-on; labaw kamaaram an pagkamananong.

³ Kon maupay ka, gintututdoan ka han pagkatangkod. An mga tawo nga diri kasasarigan napupukan pinaagi han kalugaringon nira nga pagkamalimbong.

⁴ Diri makakabulig ha imo an mga manggad ha adlaw han imo kamatayon, kundi makakatalwas han imo kinabuhi an pagkamatadong.

⁵ Tungod han pagkamatadong han waray sala nga mga tawo, masarosayon an ira kinabuhi, kundi an magraot nga tawo magdadara la ngahaw han iya kalugaringon nga pagkapukan.

⁶ An pagkamatadong nagtatalwas han tawo nga tangkod, kundi an diri kasasarigan nga tawo nabibitik han kalugaringon niya nga kahalot.

⁷ Kon napatay in maraot nga tawo, napatay man an iya paglaom. Kawang la ngay-an an pagtapod dida han bahandi.

⁸ Pinananalipdan ha kakurian an magtadong nga mga tawo; naabot lugod ini ngadto han mga magraot.

⁹ Makakabungkag ha imo an mga yakan han diri nakilala hin diyos nga mga tawo, kundi an kinaadman han mga magtadong makakatalwas ha imo.

¹⁰ Malipayon in usa nga syudad kon naghihikaupay an mga magtadong, ngan may mga pagrugyaw kon nagkakamatay an mga magraot.

¹¹ Nauswag in usa nga syudad kon ginbebendisyonan ini han mga magtadong, kundi nabubungkag ini han mga maldisyon han magraot nga mga tawo.

¹² Usa nga kalurongan an pagtamay hin iba nga mga tawo, kundi nahilom la an mga tawo nga may pagsabot.

¹³ Diri nakakatago hin sekreto an malibak nga tawo, kundi an tawo nga kasasarigan matataporan mo hin sekreto.

¹⁴ Napupukan in usa nga nasod kon waray ini magsaragdon. Aada an kalinaw kon damo an iya mga mag-upay nga magsaragdon.

¹⁵ Kon magsaad ka hin pagbayad hin utang hin lumalangyaw magbabasol ka ha orhe; maupay na la ha imo kon diri ka umapi.

¹⁶ Tinatahod an babaye nga buotan, kundi usa nga kaarawdan an babaye nga waray batasan. Diri gud magkakamay-ada kwarta an hubya nga tawo, kundi magririko an tawo nga maduruto.

¹⁷ Kon maloloy-on ka, kaupayan ini para ha imo, kundi kon maisog ka, ikaw la ngahaw in nagdadaot ha imo.

¹⁸ Waray mahihimo nga kaupayan an magraot nga mga tawo, kundi kon pagbuhaton mo an matadong, may-ada balos nga maabot ha imo.

¹⁹ Mabubuhi an bisan hin-o nga nagtitinguha hin pagbuhat hin matadong, kundi mapatay an bisan hin-o nga nagpapadayon hin pagbuhat hin sala.

²⁰ Napupungtan han Ginoo an mga tawo nga magraot an panhunahuna, kundi hinihigugma niya adton mga nagbubuhat hin matadong.

²¹ Kakastigohon manta an magraot nga mga tawo, kundi makakalikay hini adton mga magtadong.

²² An katahom hin babaye nga waray maupay nga paghukom sugad la hin singsing nga bulawan ha simod hin baboy.

²³ An ungara han mga mag-upay nga tawo, maupay pirme an dinadangatan; kon nakakakuha an mga magraot han ira karuyag, nasisina an ngatanan.

²⁴ May mga tawo nga nagpapatakas hin paggasto ngan nagtitikariko la gihapon. Tihik an iba hin paggasto, ngan nagtitikapobre la lugod.

²⁵ Pagmahinatagon ngan magmamainuswagon ka. Buligi an iba ngan bubuligan ka.

²⁶ Ginpapakaraot han mga tawo an nagtatago hin mga inani nga pagkaon ngan naghuhulat hin mahal nga prisyo, kundi gindadayaw nira an tawo nga nagpapagawas dayon basi mahibaligya ngadto han mga tawo.

²⁷ Tatahoron ka kon mag-upay an imo katuyoanan, kundi kon tadungan mo in kasamokan, imo ito hiaagian.

²⁸ Mapupukan adton mga natapod han ira manggad sugad han nagkakataktak nga mga dahon, kundi magmamainuswagon an mga magtadong sugad hin lapyo nga mga dahon.

²⁹ An tawo nga nagsasamok han iya panimalay mawawarayan gud ha kataposan. An mga lurong dayuday surugoon han mga makinaadmananon.

³⁰ Nahatag hin kinabuhi an pagkamatadong, kundi kinukuha ini han pagkamaraogdaog.

³¹ Binabalos dinhe ha tuna an mga mag-upay, sanglit waray ruhaduha kakastigohon manta an mga magraot ngan mga magpakasasala.