Mga Darahonon 1 - Samarenyo Meaning-Based Bible (1984)

Mapulsanon an mga Darahonon

¹ An mga darahonon ni Solomon nga anak ni David ngan hadi han Israel.

² Iini in mga darahonon nga makakabulig ha imo hin pagkilala han kinaadman ngan maupay nga sagdon, ngan hin pagsabot han hilarum nga mga kahulogan hin mga paaliday.

³ Makakatutdo ini ha imo hin pag-ukoy hin usa nga kinabuhi nga masinaboton, ngan kon uunanhon hin pagkatangkod, pagkamatadong, ngan pagkamaupay.

⁴ Makakahimo ini nga magkaada hibaro an usa ka tawo nga kulang pa hin gin-agian ha kinabuhi, ngan makakatutdo han mga batan-on hin pagkamakugi.

⁵ Makakadugang pa ngani ini nga mga darahonon hin hibaro ngadto hadton mga makinaadmananon, ngan makakahatag hin sagdon hadton mga mag-aram,

⁶ basi makasabot hira han tinago nga mga kahulogan hin mga darahonon ngan han mga problema nga ginpapakiana han mga makinaadmananon.

Nagwaydong han mga Batan-on

⁷ An pagtahod han Ginoo amo an tinikangan han kinaadman. Kundi an lurong nga mga tawo waray pagtahod han kinaadman ngan nadiri hira nga katutdoan.

⁸ Anak ko, pamatii an igintututdo ha imo han imo amay ngan tumana an tugon ni imo nanay.

⁹ Makakapaupay han imo pamatasan an ira igintutdo ha imo sugad nga nakakadugang han imo kamatahum in usa nga maanyag nga alikos ha liog o kwentas.

¹⁰ Anak ko, ayaw itugot nga pagsulayon ka hin mga makasasala.

¹¹ Pananglit masiring hira, “Tana, pamiling kita hin aton papatayon! Duyagi ta in waray sala nga mga tawo hin baga inintrimis la!

¹² Bangin buhi ngan mag-upay pa hira han paghiagii ta ha ira, kundi patay na hira kon human na kita hin pagduyag ha ira!

¹³ Hiaagian ta an magkalainlain nga mga manggad ngan pagpupun-on ta hin mga tinikas an aton mga balay!

¹⁴ Tana, ngan api ha amon, ngan pagbabahinbahinon naton an ngatanan nga aton makawat.”

¹⁵ Anak ko, ayaw bunyog hin sugad nga mga tawo. Pahirayo ha ira.

¹⁶ Diri hira nag-aalang hin pagbuhat hin maraot. Dayuday andam hira hin pagpatay.

¹⁷ Waray la gamit in pagbitad hin pukot kon nagkikinita an tamsi nga karuyag mo batungon,

¹⁸ kundi in sugad nga mga tawo nag-aandam hin bitik para ha ira ngahaw, usa nga bitik nga ira kamamatyan.

¹⁹ May-ada man ta gaba an paingawat nga amo an kamatay han kawatan—amo ini an nahinanabo han bisan hin-o nga nabubuhi pinaagi hin panlupig.

Nagtatawag an Kinaadman

²⁰ Pamati! Natawag an kinaadman didto han kadalanan ngan han mga taboan,

²¹ nga nagoliat didto han mga ganghaan han syudad, ngan han bisan diin nga gintitirokan han mga tawo:

²² “Mga lurong! Tubtob san-o an iyo karuyag hin pagkalurong? Tubtob san-o an iyo pagkalipay hin pagtamay han hibaro? Waray pa ba kamo pagmaan?

²³ Pamati kon sawayon ko kamo; sasagdonan ko kamo hin maupay ngan babahinan ko kamo han akon hibaro.

²⁴ Nagtinawag ako ha iyo hin pagdapit ha iyo, kundi waray gud kamo pamati. Waray la kamo bumale ha akon.

²⁵ Ginpakalimutan la niyo an ngatanan ko nga sagdon, ngan waray gud kamo maruyag nga pagtutdoan ko kamo.

²⁶ Sanglit kon abuton na kamo hin kakurian, magtitinawa la ako ha iyo. Pag-iintrimisan ko la kamo kon humampak na an kasamokan—

²⁷ kon umabot ini ha iyo sugad hin bagyo nga nagdadara hin alipuros han kasamokan, ngan aada kamo nag-aantos han kasakitan ug kakurian.

²⁸ Niyan matawag kamo ha akon, kundi diri ako mabaton. Mamimiling kamo ha akon ha ngatanan nga dapit, kundi diri ako niyo hiaagian.

²⁹ Waray gud gamit ha iyo an hibaro, ngan dayuday la kamo nagdudumiri hin pagsugot han Ginoo.

³⁰ Waray gud kamo magkinahanglan han akon sagdon o bumale ha akon han pagwaydongi ko ha iyo.

³¹ Sanglit angay kamo mag-antos, ngan an iyo kalugaringon nga mga ginawian makakapasakit ha iyo.

³² Napatay an tapang nga mga tawo kay sinisikway nira an kinaadman. Napatay liwat an lurong nga mga tawo tungod han ira kakulang hin panginlabot.

³³ Kundi diri gud maaano an bisan hin-o nga mamati ha akon. Waray niya kataragman, ngan waray gud angay niya kahahadlokan nga maraot.”