Levitico 9 - Samarenyo Meaning-Based Bible (1984)

Naghalad hi Aaron hin mga Halad nga Tinubod

¹ Dida han pagkabuwas kahuman han seremonyas han ordenasyon, gintawag ni Moises hi Aaron ngan an iya mga anak nga kalalaken-an ngan an mga pangulo han Israel.

² Nagsiring hiya kan Aaron, “Kuha hin usa nga todo nga baka ngan hin usa nga lalaki nga karnero nga waray mga dum-it, ngan ighalad ini ngadto han Ginoo, an baka para hin halad tungod hin sala ngan an karnero para hin halad nga tutuboron.

³ Niyan sidnga an mga tawo han Israel hin pagkuha hin usa nga lalaki nga kanding para hin halad tungod hin sala, usa nga nati nga baka nga usa ka tuig an panuigon, ngan usa nga nati nga karnero nga usa ka tuig an panuigon nga waray mga dum-it para hin halad nga tutuboron,

⁴ ngan hin usa nga lalaki nga baka ngan hin usa nga lalaki nga karnero para hin halad hin pagkaurosa. Ighahalad ini nira ngadto han Ginoo upod han halad nga pagkaon nga sinaktan hin lana. Kinahanglan pagbuhaton ini nira kay mapakita ha ira an Ginoo yana nga adlaw.”

⁵ Gindara nira ngadto ha atubangan han Tulda an ngatanan nga iginsugo ha ira ni Moises, ngan nagtirok didto an bug-os nga bungto basi magsingba hira han Ginoo.

⁶ Nagsiring hi Moises, “Nagsugo ha iyo an Ginoo hin pagbuhat hini ngatanan, basi magpakita ha iyo an iya himaya.”

⁷ Niyan nagsiring hiya kan Aaron, “Pakadto ha altar ngan dad-a an halad tungod hin sala ngan an halad nga tutuboron hin pagkuha han imo mga sala ngan han mga sala han mga tawo. Dad-a ini nga halad basi makuha an mga sala han mga tawo, sumala han iginsugo han Ginoo.”

⁸ Kinmadto hi Aaron ha altar ngan gin-ihaw niya an todo nga baka para han iya kalugaringon nga halad tungod hin sala.

⁹ Gindad-an hiya han iya mga anak nga kalalaken-an han dugo, ngan itinunlob niya dida hini an iya tudlo, ginpahiran han dugo an mga sungaysungay han mga kanto han altar, ngan iginhuwad an salin nga dugo ngada ha ubos han altar.

¹⁰ Niyan gintubod niya dida han altar an tambok, an mga isol, ngan an labi hin kamaupay nga bahin han atay, sumala han iginsugo han Ginoo kan Moises.

¹¹ Kundi gintubod niya an karne ngan an panit ha gawas han kampo.

¹² Gin-ihaw niya an hayop nga para han iya kalugaringon nga halad nga tutuboron. Gindad-an hiya han iya mga anak nga kalalaken-an han dugo, ngan iginsablig ini niya ngada han ngatanan nga upat nga mga ligid han altar.

¹³ Ira iginhatag ha iya an ulo ngan an iba nga mga bahin han hayop, ngan iya ini gintubod didto ha altar.

¹⁴ Niyan ginhugasan niya an mga sakob han ginhawa ngan an mangorhi nga mga paa ngan gintubod ini didto han altar, ha bawbaw han iba nga halad nga tutuboron.

¹⁵ Katapos, gindara niya an mga halad han mga tawo. Kinuha niya an kanding nga iharalad para han mga sala han mga tawo, gin-ihaw ngan ginhalad ini sugad han iya ginbuhat han iya kalugaringon nga halad tungod hin sala.

¹⁶ Gindara liwat niya an hayop para han halad nga tutuboron ngan iginhalad ini sumala han mga turumanon.

¹⁷ Gindara niya an halad nga pagkaon ngan kinmuha hiya hin usa ka kumkom nga harina ngan ginsunog ini didto han altar. (Labot la ini han ikinaadlaw nga halad nga ginsusunog.)

¹⁸ Gin-ihaw niya an lalaki nga baka ngan an lalaki nga karnero nga usa nga halad hin pagkaurosa para han mga tawo. Gindad-an hiya han iya mga anak nga kalalaken-an han dugo, ngan iya iginsablig ini ngada han ngatanan nga upat nga mga ligid han altar.

¹⁹ Iginbutang ni Aaron an magtambok nga mga bahin han lalaki nga baka ngan han lalaki nga karnero

²⁰ ha bawbaw han mga dughan han mga hayop ngan gindara ini ngatanan ngadto ha altar. Gintubod niya an tambok didto ha altar,

²¹ ngan iginhalad an mga dughan ngan an tuo nga mangorhi nga mga paa sugad nga linain nga regalo ngadto han Ginoo para han kapadian, sumala han iginsugo ni Moises.

²² Han kahuman na ni Aaron han ngatanan nga mga paghalad, ginbayaw niya an iya kamot ha igbaw han mga tawo ngan ginbendisyonan niya hira, ngan katapos, linmusad hiya.

²³ Sinmulod hira Moises ug Aaron ngadto han Tulda han Ginoo, ngan han paggawas nira, ginbendisyonan nira an mga tawo, ngan pinmakita ha ngatanan nga mga tawo an himaya han Ginoo.

²⁴ Ha gilayon nagpadara an Ginoo hin kalayo nga nag-ugtang an halad nga tutuboron ngan an magtambok nga mga bahin dida han altar. Han pakakita hini han mga tawo, ginmoliat hira ngatanan ngan hinmapa hira ha tuna.