Levitico 6 - Samarenyo Meaning-Based Bible (1984)

¹ Iginhatag han Ginoo kan Moises ini nga mga turumanon.

² Paghihimoon in usa nga paghalad kon may-ada nakasala kontra han Ginoo pinaagi hin diri pag-ooli han iginpahipos ha iya hin igkasi Israelita, sugad nga garantiya, o pinaagi hin pangawat ha iya, o pinaagi hin paglimbong ha iya,

³ o pinaagi hin pagbuwa hiunong hin butang nga nawara ngan pagsumpa nga waray niya hiagii ini.

^4-5 Kon nakasala in usa ka tawo hin bisan hain hini nga mga paagi, kinahanglan pagbaydan niya an bisan ano nga iya nakuha hin diri matadong nga paagi. Ha adlaw nga hibaroan nga salaan hiya, kinahanglan pagbaydan niya ngatanan an tag-iya, nga may dugang nga 20 por syento.

⁶ Pagdadad-on niya ngadto han padi sugad nga iya halad nga bayad ngadto han Ginoo in usa nga lalaki nga karnero o kanding nga waray mga dum-it. Pag-iigoigoon an balor hini sumala han opisyal nga timbangan.

⁷ Tuluboron han padi an halad para han sala han tawo, ngan pasasayloon hiya.

Mga Turumanon Bahin hin Sinunog nga Halad

⁸ Ginsugo han Ginoo hi Moises

⁹ hin paghatag kan Aaron ngan han iya mga anak nga kalalaken-an han masunod nga mga turumanon para hin mga sinunog nga halad. Babayaan an sinunog nga halad dida han altar ha bug-os nga gab-i, ngan diri paparongon an kalayo.

¹⁰ Niyan kukuhaon han padi nga nakakasul-ot han iya kapa nga lino ngan halipot nga saruwal nga lino an tambokon nga agbon nga binayaan dida han altar, ngan ibubutang ini didto ha ligid han altar.

¹¹ Niyan magliliwan hiya han iya biste ngan dadad-on niya an agbon ngadto ha gawas han kampo, ngadto hin malinis nga dapit sumala han seremonyas.

¹² Kinahanglan diri kawarayan hin kalayo dida ha altar ngan diri gud ini pagparongon. Kada aga pagsusung-an ini han padi, ibabawbaw dida hini an halad nga susunogon, ngan pagsusunogon niya an tambok han halad nga pagkaurosa.

¹³ Kinahanglan diri kawarayan hin kalayo dida ha altar ngan diri gud ini pagparongon.

Mahitungod pa Ini hin Iba nga mga Halad nga Pagkaon

¹⁴ Amo ini an mga turumanon para han mga halad nga pagkaon. Pagdadad-on hin usa nga padi nga tulin ni Aaron an halad nga pagkaon ngadto han Ginoo ha atubangan han altar.

¹⁵ Niyan maharop hiya hin usa ka kumkom han harina nga sinaktan hin lana ngan insyenso, ngan pagsusunogon ini dida ha altar ngan usa ini nga hinumdoman nga iginhalad na ini ngatanan ngadto han Ginoo. Nakakalipay han Ginoo an alimyon hini nga halad.

^16-17 Kakaonon han kapadian an salin hini. Paghihimoon ini nga tinapay nga hinudno nga waray patubo ngan kakaonon didto hin baraan nga dapit ha bungsaran han Tulda han Ginoo. Iginhatag ini han Ginoo ngadto han kapadian nga ira bahin han mga halad nga pagkaon. Labi ini hin ka baraan sugad han mga halad tungod hin sala ngan han mga halad hin pagbayad.

¹⁸ Ha ngatanan nga panahon nga tiarabot makakakaon hini in bisan hin-o han mga tulin nga kalalaken-an ni Aaron sugad nga ira bahin nga waray katapos han pagkaon nga iginhalad ngadto han Ginoo. Bisan hin-o nga magpasipara hin pagkapot hin usa nga halad nga pagkaon, madadaot hiya tungod han gahom han pagkabaraan hini nga halad.

An Halad han Pagkapadi

¹⁹ Iginhatag han Ginoo kan Moises an masunod nga mga turumanon

²⁰ para han pag-orden hin padi nga tulin ni Aaron. Dida han adlaw nga oordenahan hiya, maghahalad hiya ngadto han Ginoo hin usa ka kilo nga harina (sugad kadamo han ikinaadlaw nga halad nga pagkaon), an katunga ha aga ngan an katunga ha gab-i.

²¹ Pagsasaktan ini hin lana ngan paglulutoon dida hin lata nga parilyahan, ngan katapos pagkukusaton ini ngan ipapahayag ini nga usa nga halad nga pagkaon kanay alimyon nakakalipay han Ginoo.

²² Ha ngatanan nga panahon nga tiarabot paghihimoon ini nga paghalad han tagsa nga tulin ni Aaron, nga gin-ordenan hin ka Labaw nga Padi ha pag-alagad han Ginoo. Pagtutuboron ini ngatanan sugad han hayop nga tinubod ngadto han Ginoo.

²³ An ngatanan nga pagkaon nga ginhalad hin usa nga padi kinahanglan diri kaonon; kinahanglan pagsunogon ini ngatanan.

Mahitungod pa Ini hin mga Halad Tungod hin Sala

²⁴ Ginsugo han Ginoo hi Moises

²⁵ hin paghatag kan Aaron ngan han iya mga anak nga kalalaken-an han masunod nga mga turumanon para hin mga halad tungod hin sala. Kinahanglan pag-ihawon an hayop para hin halad tungod hin sala didto han amihanan nga dapit han altar diin gin-iihaw an mga hayop para han mga gintutubod nga halad. Labi hin ka baraan ini nga halad.

²⁶ An padi nga naghahalad han hayop amo an makaon hini didto hin usa nga baraan nga dapit, ha bungsaran han Tulda han Ginoo.

²⁷ Bisan hin-o o bisan ano nga makakapot han unod han hayop, madadaot hiya tungod han gahom han pagkabaraan han halad. Kon matabsikan han dugo han hayop in bisan ano nga dugnit, kinahanglan paglabhan ini didto hin baraan nga dapit.

²⁸ Kinahanglan pagbuongon an daba nga ginlalagaan han karne, ngan kon gamiton in usa nga lutoan nga bronse, kinahanglan pagbagnosan ini ngan paghugasan hin maupay.

²⁹ Makakakaon hini nga halad in bisan hin-o nga lalake han padianon nga mga panimalay; labi ini hin baraan.

³⁰ Kundi kon pagdad-on ngadto han Tulda in bahin han dugo ngan gamiton ini dida han seremonyas hin pagkuha hin sala, kinahanglan diri pagkaonon an hayop; kinahanglan pagtuboron an halad nga hayop.