Levitico 5 - Samarenyo Meaning-Based Bible (1984)

Igintutdo an Paghalad hin mga Halad tungod hin Sala

¹ Ginkikinahanglan in mga halad tungod hin sala dida han nasunod nga mga higayon. Kon tawagon in usa ka tawo ngadto ha hukmanan hin paghatag hin kasayoran ngan diri hiya magsumat hiunong han iya hinkit-an o hinbatian, kinahanglan andam hiya hin pagkarawat han sirot tungod han karat-an nga maabot ha iya.

² Kon malipat in usa ka tawo hin pagkapot hin bisan ano nga mahugaw sumala han seremonyas, sugad pananglit hin usa nga patay nga hayop, mahugaw ngan makakasala hiya kon makasabot hiya han iya nabuhat.

³ Kon malipat in usa ka tawo hin pagkapot hin bisan ano nga mahugaw nga aada ha tawo, bisan kon ano ini, makakasala hiya kon makasabot hiya han iya nabuhat.

⁴ Kon magdalidali in usa ka tawo hin pagsumpa, hiunong hin bisan ano, makakasala hiya kon makasabot hiya han iya nabuhat.

⁵ Kon salaan in usa ka tawo kinahanglan igkompisal niya an sala,

⁶ ngan sugad nga sirot han iya sala, kinahanglan magdara hiya ngadto han Ginoo hin usa nga babayi nga karnero o kanding nga iya ighahalad. Ighahalad han padi an hayop nga tutuboron para han sala han tawo.

⁷ Kon diri an tawo makahatag hin karnero o kanding, magdara hiya ngadto han Ginoo sugad nga bayad han iya sala hin duha nga sarapati o duha nga tukmo, an usa halad tungod han sala, ngan an ikaduha halad nga susunogon.

⁸ Pagdadad-on ini niya ngadto han padi nga maghahalad anay han tamsi para han halad tungod hin sala. Babarion niya an liog hini, kundi diri pupugotan han ulo,

⁹ ngan wawarikwik in bahin han dugo hini ngada han ligid han altar. Patuturoon an salin nga dugo ngada han ubos han altar. Halad ini hin pagkuha hin sala.

¹⁰ Niyan ighahalad niya an ikaduha nga tamsi sugad nga halad nga susunogon sumala han mga turumanon. Hini nga paagi susunogon han padi an halad para han sala han tawo, ngan pasasayloon hiya.

¹¹ Kon an tawo diri makakahatag hin duha nga sarapati o duha nga tukmo, magdadara hiya hin usa ka kilo nga harina sugad nga halad tungod hin sala. Diri niya bubutangan ini hin lana hin olibo o insyenso, kay halad ini tungod hin sala, diri halad nga pagkaon.

¹² Pagdadad-on ini niya ngadto han padi nga makuha hin usa ka kumkom hini sugad nga iginhalad na nga hinumdoman ini ngatanan ngadto han Ginoo, ngan iya pagsusunogon ini dida han altar sugad nga usa nga halad nga pagkaon. Halad ini hin pagkuha hin sala.

¹³ Hini nga paagi han padi an halad para han sala han tawo, ngan pasasayloon hiya. Kanan padi na an salin han harina, sugad han nahisalin dida han halad nga pagkaon.

Igintutdo an Paghalad hin mga Kabaraydan nga Halad

¹⁴ Iginhatag han Ginoo kan Moises inin masunod nga mga turumanon.

¹⁵ Kon nakasala nga diri tinuyo ini bisan hin-o pinaagi hin diri pakadara ngadto han Ginoo han bayad hin mga butang nga baraan, magdadara hiya hin iya halad ngadto han Ginoo nga bayad hin usa nga lalaki nga karnero o kanding nga waray mga dum-it. Pag-iigoigoon an balor hini sumala han opisyal nga timbangan.

¹⁶ Kinahanglan taparan niya an hinngalimtan niya hin pagdara, ngan kinahanglan dugangan ini niya hin 20 por syento. Ighahatag ini niya ngadto han padi, ngan tutuboron han padi an hayop nga usa nga halad para han sala han tawo, ngan pasasayloon hiya.

¹⁷ Kon nakasala nga diri tinuyo an bisan hin-o hin pagsupak hin usa han mga sugo han Ginoo, salaan hiya ngan kinahanglan baydan niya an multa.

¹⁸ Kinahanglan pagdad-on niya ngadto han padi sugad hin kabaraydan nga halad in usa nga lalaki nga karnero o kanding nga waray mga dum-it. Pag-iigoigoon an balor hini sumala han opisyal nga timbangan. Tutuboron han padi an halad para han sala han tawo, ngan pasasayloon hiya.

¹⁹ Halad ini nga bayad han sala nga nabuhat niya kontra han Ginoo.