Levitico 26 - Samarenyo Meaning-Based Bible (1984)

May mga Kaupayan an Pagkamasinugtanon

¹ Nagsiring an Ginoo, “Ayaw kamo paghimo hin mga diyosdiyos, o pagtindog hin tinigib nga mga ladawan, mga harigi nga bato, o tinigib nga mga bato nga iyo pagsisingbahon. Hi ako an Ginoo nga iyo Dyos.

² Pagtumana niyo an mga siringbahan nga pyesta ngan pagpasidunggi an dapit nga ginsisingbahan ha akon. Hi ako an Ginoo.

³ “Kon mag-ukoy kamo hin kinabuhi sumala han akon mga balaod ngan magsugot kamo han akon mga sugo,

⁴ ipadadara ko an uran ha igo nga panahon basi humatag hin damo nga mga abot an tuna ngan mamunga an kakahoyan.

⁵ Magdadamo hin duro an iyo mga abot, nga mag-aani pa kamo hin trigo ha panahon nga igkuruha na hin mga ubas, ngan magkukuha pa kamo hin mga ubas ha panahon nga igtaranom na hin trigo. Magkakamay-ada kamo han ngatanan nga iyo karuyag kaonon, ngan makakag-ukoy kamo hin waray kataragman didto han iyo tuna.

⁶ “Tatagan ko kamo hin kalinaw didto han iyo tuna, ngan makakakaturog kamo hin waray niyo sadang kahadlokan. Pagpupuohon ko an magpintas nga kamanampan didto han tuna, ngan mawawaray na araway didto.

⁷ Magmamadaogon kamo kontra han iyo mga kaaway;

⁸ makakapirde hin usa ka gatos an lima ha iyo ngan makakapirde hin napulo ka yukot an usa ka gatos.

⁹ Pagbebendisyonan ko kamo ngan tatagan ko kamo hin damo nga mga anak; pagtutumanon ko an akon bahin han Ginsaaran nga akon ginhimo ha iyo.

¹⁰ Magdadamo hin duro an iyo mga abot nga diri ini mauubos sulod hin usa ka tuig, ngan iglalabog niyo an nahisalin han daan nga inani basi may-ada kabutangan han bag-o nga mga inani.

¹¹ Mag-uokoy ako upod ha iyo didto han akon baraan nga Tulda, ngan diri ko gud kamo tatalikdan.

¹² Maupod ako ha iyo; magigin Dyos ako niyo, ngan magigin katawhan ko kamo.

¹³ Hi ako an Ginoo nga iyo Dyos nga nagpagawas ha iyo ha Ehipto basi diri na gud kamo maoripon nira. Ginbungkag ko an gahom nga naggapos ha iyo ngan ginpalakat ko kamo hin waray kaawod.”

Kakastigohon an Masinupakon

¹⁴ Nagsiring an Ginoo, “Kon diri kamo magsugot han akon mga sugo, pagkakastigohon ko kamo.

¹⁵ Kon dumiri kamo hin pagsugot han akon mga balaod ngan mga sugo, ngan diri kamo magtuman han ginsaaran nga akon ginhimo ha iyo,

¹⁶ pagkakastigohon ko kamo. Padadad-an ko kamo hin damo nga mga karat-an—mga sakit nga diri nauupay ngan mga hiranat nga makakapabuta ha iyo ngan makakapagasa hin duro ha iyo. Magtatanom kamo, kundi waray la ini kaupayan ha iyo, kay pagsasakopon kamo han iyo mga kaaway ngan hira an makaon han iyo mga gintanom.

¹⁷ Pagkokontrahon ko kamo basi mapirde kamo, ngan paghahadian kamo hadton mga nagdudumot ha iyo; mahahadlok kamo hin duro ngan madalagan kamo bisan kon waray naglalanat ha iyo.

¹⁸ “Kon bisan pa hini ngatanan diri la gihapon kamo magsugot ha akon, pagdudugangan ko hin pito ka pilo an iyo kastigo.

¹⁹ Pagpapaubson ko an iyo duro nga kamapahitas-on; mawawaray uran, magmamara ngan mababangkil sugad hin puthaw an iyo tuna.

²⁰ Makakawang la an ngatanan niyo nga pagkinabudlay, kay diri mahatag hin mga abot an iyo tuna ngan diri mamumunga an kakahoyan.

²¹ “Kon magpadayon la kamo gihapon hin pag-ato ha akon ngan diri kamo magsugot ha akon, pagdudugangan ko na liwat hin pito ka pilo an iyo kastigo.

²² Ipadadara ngada ha iyo in magpintas nga kamanampan, ngan pamamatayon hini an iyo mga anak, pupuohon an iyo kahayopan, ngan gutiay gud la an isasalin ha iyo nga waray na hikikit-an nga maglalakat dida han iyo mga dalan.

²³ “Kon katapos hini ngatanan nga mga kastigo, diri la gihapon kamo mamati ha akon, kundi magpadayon kamo hin pag-ato ha akon,

²⁴ niyan pagkokontrahon ko kamo ngan pagkakastigohon ko kamo hin pito pa ka pilo hin kamakuri kay han una.

²⁵ Ipadadara ko ha iyo in araway hin pagkastigo ha iyo tungod han diri niyo pagtuman han aton ginsaaran, ngan kon magtirok kamo didto han iyo mga syudad basi mamarayaw an iyo kamutangan, magpapadara ako ha iyo hin mga sakit nga makamaratay, ngan mapipirit kamo hin pagtubyan ngadto han iyo mga kaaway.

²⁶ Pag-uutdon ko an kinukuhaan han iyo pagkaon, basi usa na la nga hudnoan in gagamiton hin napulo nga kababayen-an hin pagluto han ngatanan nira nga tinapay. Igrarasyon nira an tinapay, ngan kahuman niyo kumaon hini ngatanan, gugutomon la gihapon kamo.

²⁷ “Kon katapos hini ngatanan, magpadayon la kamo gihapon hin pag-ato ngan diri pagsugot ha akon,

²⁸ niyan, ha akon kapungot, pagkokontrahon ko kamo ngan pagkakastigohon ko na liwat kamo hin pito pa ka pilo hin kamakuri kay han una.

²⁹ Makalilisang nga kagutom an maabot ha iyo nga mapupugos kamo hin pagkaon han iyo kalugaringon nga mga anak.

³⁰ Pagbubungkagon ko an iyo mga dapit hin pagsingba didto han kapungtoran, pagrurub-on ko an iyo mga altar hin insyenso, ngan igpipilak ko an iyo patay nga mga lawas ngadto han napukan nga mga diyosdiyos niyo. Ha akon duro nga kapungot

³¹ paggugun-obon ko an iyo mga syudad, ngan an iyo mga dapit hin pagsingba, ngan diri ko na kakarawaton an iyo mga halad nga tinubod.

³² Pagwawakayon ko gud an iyo tuna nga mahahadlok hin duro an mga kaaway nga nag-uokoy dida hini tungod han duro gud nga pagkabungkag hini.

³³ Padadad-an ko kamo hin araway ngan igpapasarang ko kamo didto hin langyaw nga mga tuna. Pagbabayaan niyo an iyo kalugaringon nga tuna, ngan pababay-an ko ha kabungkagan an iyo mga syudad.

^34-35 Niyan mahiaagom an tuna hin maiha nga tim-os nga pagpahuway kay diri ini katatamnan; babayaan ini niyo ngan makakapahuway samtang aadto kamo ha pagkabihag didto han tuna han iyo mga kaaway.

³⁶ “Pahahadlokon ko hin duro kamo nga aadto ha pagkabihag nga makakapadalagan ha iyo bisan la an karasikas hin iginpapalid nga dahon. Magdadadlagan kamo sugad hin ginlalanat didto ha pag-awayan, ngan mapupukan kamo bisan waray kaaway nga hirani ha iyo.

³⁷ Magbabarangga kamo hin kalisang bisan kon waray naglalanat ha iyo, ngan diri kamo makakaato bisan kan kanay han iyo mga kaaway.

³⁸ Magkakamatay kamo didto ha pagkabihag, ngan lalam-oyon kamo han tuna han iyo mga kaaway.

³⁹ Manggagasa hin duro an pipira ha iyo nga mahisasalin nga buhi didto han tuna han iyo mga kaaway, tungod han iyo kalugaringon nga sala ngan tungod han sala han iyo kaapoy-apoyan.

⁴⁰ “Kundi magkokompisal an iyo mga tulin han ira mga sala ngan han mga sala han ira kaapoy-apoyan nga inmato ngan sinmupil ha akon,

⁴¹ ngan nakaaghat ha akon hin pagkontra ha ira ngan pagpadara ha ira ngadto ha pagkabihag didto han tuna han ira mga kaaway. Ha kataposan, kon magpaubos na an iyo mga tulin ngan kon makabayad na hira han sirot han ira mga sala ug pagsupil,

⁴² hinunumdoman ko an akon ginsaaran kan Jacob, kan Isaac, ngan kan Abraham, ngan pagbabag-ohon ko an akon saad hin paghatag han tuna ngadto han akon mga tawo.

⁴³ Kundi syahan, kinahanglan iwasan an tuna han ngatanan nga mga tawo niya basi makagpahimulos an tuna hin tim-os nga pagpahuway, ngan kinahanglan pagbaydan nira an bug-os nga sirot tungod han pagsikway nira han akon mga balaod ngan mga sugo.

⁴⁴ Kundi bisan pa hini, samtang aadto pa hira han tuna han ira mga kaaway, diri ko gud hira babayaan o pupuohon, basi diri mautod an akon ginsaaran nga ginhimo ko ha ira, ngan ako an Ginoo nga ira Dyos.

⁴⁵ Pagbabag-ohon ko an ginsaaran nga ginhimo ko ngan han ira kaapoy-apoyan dida han pagpakitaa ko han ngatanan nga mga nasod han akon gahom pinaagi han pagpagawsa ko ha Ehipto han akon mga tawo, basi ako nga Ginoo mahimo nga ira Dyos.”

⁴⁶ Ini ngatanan amo an mga balaod ngan mga sugo nga iginhatag han Ginoo kan Moises didto ha Bukid Sinai para han mga tawo han Israel.