Levitico 25 - Samarenyo Meaning-Based Bible (1984)

An Kada Ikapito ka Tuig Pahuway hin Pag-uma

¹ Naghimangraw an Ginoo kan Moises didto ha Bukid Sinai ngan ginsugo hiya

² hin paghatag hinin masunod nga mga turumanon ngadto han mga tawo han Israel. Kon sumulod na kamo han tuna nga ighahatag ha iyo han Ginoo, kinahanglan pagpasidunggan niyo an Ginoo pinaagi hin diri pag-uma han tuna ha kada ikapito ka tuig.

³ Kinahanglan pagtamnan niyo an iyo mga uma, paghawanan an iyo mga urubasan, ngan pag-anihon an iyo mga abot sulod hin unom ka tuig.

⁴ Kundi tim-os gud nga pagpahuway han tuna an ikapito ka tuig, an tuig nga iginhalad ngadto han Ginoo. Ayaw niyo pagtamni an iyo mga uma o paghawani an iyo mga urubasan.

⁵ Ayaw niyo pag-aniha an aranihon nga turok la ha iyo uma, ngan ayaw niyo panguhaa an mga ubas han iyo waray paghawani nga mga puno hin ubas. Usa ini ka tuig hin tim-os nga pagpahuway han tuna.

⁶ Bisan kon diri niyo pag-umhon an tuna hito nga tuig, mahatag ini hin pagkaon para ha iyo, han iyo mga oripon, han iyo sinuholan nga mga tawo, han mga lumalangyaw nga nag-uokoy kaupod ha iyo,

⁷ han iyo binuhi nga mga hayop, ngan han ihalas nga mga mananap didto han iyo kaumhan. Mahihimo kaonon an ngatanan nga abot han tuna.

May Tuig hin Pagpahioli

⁸ Pag-ihap hin pito ka tag pito ka tuig, nga maabot hin 49 ka tuig ngatanan.

⁹ Niyan dida han ikanapulo nga adlaw han ikapito nga bulan, an Adlaw han Pagtubos, pagsugo hin usa ka tawo hin pagtrompeta ha bug-os nga tuna.

¹⁰ Dida hini nga paagi iglalain niyo an ika-50 nga tuig ngan igsasangyaw niyo an kagawasan ngadto han ngatanan nga mga umurukoy han tuna. Sulod hini nga tuig ig-ooli ngadto han tunay nga tag-iya o han iya mga tulin an ngatanan nga hiagi nga iginbaligya, ngan igbabalik ngadto han iya panimalay an ngatanan nga iginbaligya nga oripon.

¹¹ Diri niyo pagtatamnan an iyo kaumhan o pag-aanihon an aranihon nga turok la ha iyo uma, o pangunguhaon an mga ubas didto han iyo mga urubasan nga waray niyo paghawani.

¹² Magigin baraan gud para ha iyo an bug-os nga tuig; kakaonon la niyo adton mga abot tikang han kaumhan nga waray niyo pagtrabaho-a.

¹³ Dida hini nga tuig ig-ooli ngadto han tunay nga tag-iya an ngatanan nga hiagi nga iginbaligya.

¹⁴ Sanglit kon magbaligya kamo hin tuna ngadto han iyo igkasi Israelita o pumalit kamo tikang ha iya hin tuna, ayaw niyo pagbuhata an diri kaangayan.

¹⁵ Ipasikad an bayad han tuna dida han kadamo han mga tuig nga pagpupulsan an tuna ngada han pag-abot han Tuig han Pagpahioli.

¹⁶ Kon damo pa an mga tuig, marumahal man an bayad, kundi kon gutiay na la an mga tuig, barubarato man an bayad, kay an iginbabaligya amo an kadamo han mga abot nga mahahatag han tuna.

¹⁷ Ayaw paglimbong hin iyo igkasi Israelita, kundi kahadloki ngan tahora niyo an Ginoo nga iyo Dyos.

Ginbaton an Problema han Ikapito nga Tuig

¹⁸ Pagsugta niyo an ngatanan nga mga balaod ngan mga sugo han Ginoo, basi mamurayaw an iyo pag-ukoy didto han tuna nga iyo kakadtoan.

¹⁹ Mahatag an tuna hin damo nga mga abot ngan magkakamay-ada kamo han ngatanan nga karuyag niyo nga pagkaon, ngan mag-uokoy kamo hin waray kataragman.

²⁰ Kundi bangin may-ada magpakiana kon ano man an iyo kaonon sulod han ikapito nga tuig nga waray kaumhan nga pagtatamnan ngan waray mga abot nga pag-aanihon?

²¹ Pagbebendisyonan han Ginoo an tuna dida han ikaunom nga tuig basi makahatag ini hin igo nga pagkaon hin kanan duha ka tuig.

²² Kon magtanom kamo han iyo mga uma dida han ikawalo nga tuig, kakaonon pa niyo an iyo gin-ani hadton ikaunom nga tuig, ngan magkakamay-ada kamo igo nga pagkaon tubtob han pag-ani han iyo igintanom hito nga tuig.

Igpapahioli an mga Hiagi

²³ Kinahanglan diri niyo igbaligya ha kadayonan an iyo tuna kay diri kamo an tag-iya han iyo tuna; an Dyos an tag-iya hini ngan sugad la kamo hin mga lumalangyaw nga gintugotan hin paggamit hini nga tuna.

²⁴ Kon ginbabaligya in tuna, kinahanglan kilalahon niyo an katungod han tunay nga tag-iya hin paglukat han tuna.

²⁵ Kon magin kablas in usa nga Israelita ngan mapirit hiya hin pagbaligya han iya tuna, lulukaton ini han iya gisusuoki nga urupod.

²⁶ Adton tawo nga waray urupod nga malukat hini, bangin magmainuswagon hiya ha orhe, ngan mamay-ada niya katakos hin paglukat hini.

²⁷ Ha sugad nga kahimtang, kinahanglan baydan niya an tawo nga pinmalit han tuna hin kantidad nga igo para han mga tuig nga nahibibilin pa ngada han Tuig han Pagpahioli, ngan mababawi niya an iya tuna.

²⁸ Kundi kon waray niya igo nga kwarta hin paglukat han tuna, magpapabilin ini ha ubos han pagdumara han tawo nga nakapalit hini ngada han Tuig han Pagpahioli. Dida hito nga tuig ig-ooli an tuna ngadto han tunay nga tag-iya hini.

²⁹ Kon magbaligya in usa ka tawo hin balay didto hin pinaderan nga syudad, may-ada niya katungod hin paglukat hini ha pagtagmo han syahan nga tuig tikang han pagpalita hini.

³⁰ Kundi kon diri ngani niya lukaton ini sulod hito nga tuig, nawawara an iya katungod hin paglukat han balay, ngan an balay maaangkon na ha kadayonan han nagpalit ngan han iya mga tulin; diri na ini ig-ooli dida han Tuig han Pagpahioli.

³¹ Kundi pag-iisipon sugad hin mga uma in mga balay didto hin mga baryo nga waray mga pader; may katungod an tunay nga tag-iya hin paglukat hini, ngan ig-ooli ini dida han Tuig han Pagpahioli.

³² Kundi may-ada katungod an mga Levita hin paglukat, ha bisan san-o nga panahon, han ira mga hiagi didto han mga syudad nga iginhatag ha ira hin pagdumara.

³³ Kon igbaligya hin usa nga Levita in usa nga balay didto hin usa hini nga mga syudad ngan waray ini lukata niya, kinahanglan ig-oli ini dida han Tuig han Pagpahioli, kay an mga balay nga gintatag-iya han mga Levita didto han ira mga syudad ira ini dayon nga hiagi dida han mga tawo han Israel.

³⁴ Kundi kinahanglan diri gud igbaligya an pasabsaban nga tuna palibot han mga syudad han mga Levita, kay ira ini hiagi ha kadayonan.

May Balaod hin Pagpautang ngadto han mga Pobre

³⁵ Kon magin kablas in usa nga igkasi Israelita nga nag-uokoy hirani ha iyo ngan diri na hiya nakakabuhi han iya kalugaringon, kinahanglan buligan niyo hiya sugad han iyo pagbulig hin sinuholan nga tawo, basi makagpadayon hiya hin pag-ukoy hirani ha iyo.

³⁶ Ayaw hiya pagsukti hin patubo, kundi pagsugta an Dyos ngan paokya an iyo igkasi Israelita hirani ha iyo.

³⁷ Ayaw hiya pagpabayda hin patubo han kwarta nga iyo ginpahuram ha iya, ngan ayaw hiya pagpaganansyahi han pagkaon nga iyo ibinabaligya ha iya.

³⁸ Amo ini an sugo han Ginoo nga iyo Dyos nga nagpagawas ha iyo ha Ehipto basi ihatag ha iyo an tuna han Canaan ngan basi hiya magin iyo Dyos.

Bubuhian an mga Oripon

³⁹ Kon magin kablas na gud in usa nga igkasi Israelita nga nag-uokoy hirani ha iyo ngan mapirit hiya hin pagbaligya ha iyo han iya kalugaringon hin pagkaoripon, ayaw hiya pagpabuhata han mga buruhaton hin usa nga oripon.

⁴⁰ Mag-uokoy hiya upod ha iyo sugad hin usa nga sinuholan ngan mag-aalagad hiya ha iyo tubtob han Tuig han Pagpahioli.

⁴¹ Dida hito nga tuig mabaya ha iyo hiya ngan an iya mga anak ngan mabalik hiya ngadto han iya panimalay ngan ngadto han tuna han iya mga ginikanan.

⁴² Mga oripon han Ginoo an mga tawo han Israel, ngan iya ginpagawas hira ha Ehipto; kinahanglan diri hira igbaligya ngadto hin pagkaoripon.

⁴³ Ayaw niyo hira pagpakurii, kundi pagsugta niyo an iyo Dyos.

⁴⁴ Kon magkinahanglan kamo hin mga oripon, palita hira didto han mga nasod nga hirani ha iyo.

⁴⁵ Makakapalit liwat kamo han mga anak han mga lumalangyaw nga nag-uokoy dida ha iyo. Mahihimo nga magin iyo hiagi in sugad nga mga anak nga natawo dida han iyo tuna,

⁴⁶ ngan mahihimo igbilin niyo hira sugad hin panurundon ngadto han iyo mga anak nga kalalaken-an, nga kinahanglan pag-alagdon nira samtang buhi pa hira. Kundi kinahanglan diri gud niyo pagpakurian an bisan hin-o han iyo igkasi mga Israelita.

⁴⁷ Pananglit magriko in usa nga lumalangyaw nga nag-uokoy upod ha iyo, samtang magin kablas in usa nga igkasi Israelita ngan mapirit hiya hin pagbaligya han iya kalugaringon hin pagkaoripon ngadto hito nga lumalangyaw o ngadto hin usa nga sakop han iya panimalay.

⁴⁸ Katapos hiya igbaligya, may-ada pa gihapon hiya katungod nga malukat hiya. Usa han iya kabugtoan nga kalalaken-an,

⁴⁹ o iya bata, o iya patod, o iba han iya suok nga kaurupdan makakahimo hin paglukat ha iya; o kon makaagi hiya hin igo nga kwarta, makakahimo hiya hin paglugaring hin paglukat ha iya ngahaw.

⁵⁰ Kinahanglan makigkita hiya han tawo nga pinmalit ha iya, ngan kinahanglan pag-ihapon nira kon pira ka tuig tikang han pagbaligya ha iya ngadto han Tuig han Pagpahioli, ngan kinahanglan pag-igoigoon an bayad han iya kagawasan pinasikad han mga suhol nga iginbabayad ngadto hin usa nga sinuholan.

^51-52 Kinahanglan ig-oli niya in bahin han iginpalit nga kwarta sumala han kadamo han nahibibilin pa nga mga tuig,

⁵³ nga daw sugad hin tinuig an pagsuhol ha iya. Kinahanglan diri gud hiya pagpakurian han iya agaron.

⁵⁴ Kon diri hiya pagbuhian ha bisan hain hini nga mga paagi, kinahanglan buhian hiya ngan an iya mga anak dida han Tuig han Pagpahioli.

⁵⁵ Diri mahihimo nga oripon ha kadayonan in usa nga Israelita, kay mga oripon han Ginoo an mga tawo han Israel. Iya ginpagawas hira ha Ehipto; hiya an Ginoo nga ira Dyos.