Levitico 24 - Samarenyo Meaning-Based Bible (1984)

Mamangnoan an mga Lampara

¹ Ginsiring han Ginoo hi Moises

² nga sugoon niya an mga tawo han Israel hin pagdara hin puraw nga lana hin olibo para han mga lampara didto han Tulda, basi dayuday maglaga in usa nga suga.

³ Kada gab-i paparoktan ini ni Aaron ngan palalagahon tubtob han pagkaaga, didto ha atubangan han Ginoo ha gawas han biray ha atubangan han Kahon han Ginsaaran nga aadto han Labi ka Baraan nga Dapit. Kinahanglan tumanon ini ha ngatanan nga panahon nga tiarabot.

⁴ Hi Aaron an magmamangno han mga lampara dida han kandelero nga puraw nga bulawan ngan kinahanglan dayuday palagahon gud ini niya ha atubangan han Ginoo.

Iginpahalad ngadto han Dyos an Tinapay

⁵ Kuha kamo hin mga dose ka kilo nga harina ngan paghudno hin dose ka bug-os nga tinapay.

⁶ Ibutang an mga tinapay dida hin duha ka rumbay, tag unom an kada rumbay, ha bawbaw han lamesa nga bulawan an bawbaw nga aadto ha atubangan han Ginoo.

⁷ Butangi hin puraw nga insyenso an kada rumbay sugad nga usa nga hinumdoman nga halad nga pagkaon ngadto han Ginoo liwan han tinapay.

⁸ Ha kada Adlaw nga Iparahuway, ha ngatanan nga panahon nga tiarabot, kinahanglan ibutang an tinapay ha atubangan han Ginoo. Padayon ini nga katungdanan han Israel.

⁹ Kanda Aaron ngan han iya mga tulin ini nga mga tinapay, ngan kakaonon ini nira didto hin usa nga baraan nga dapit, kay baraan kaupay ini nga pagkaon nga halad ngadto han Ginoo para han kapadian.

Panigamnan Ini hin Matadong ngan Igo nga Sirot

^10-11 May-ada hadto usa ka tawo nga Ehiptohanon an amay niya ngan Israelita an iroy niya. An ngaran han iroy niya amo hi Selomit nga anak ni Dibri tikang han tribo ni Dan. Didto han kampo nakigbalingkot ini nga tawo hin usa nga Israelita. Dida han nagbabalingkotay hira, ginpanhimaraot niya an Ginoo, sanglit ira gindara hiya ngadto kan Moises.

¹² Ginpabantayan hiya ngan naghulat hira han Ginoo kon ano gud an igpapabuhat ha ira han Ginoo.

¹³ Nagsiring an Ginoo kan Moises,

¹⁴ “Igawas han kampo ito nga tawo. Ipapandong ha ulo han tawo an mga kamot han ngatanan nga nakabati han iya pagtunglo ha akon, ha pagpamatuod nga salaan hiya, ngan katapos, pagbabatoon hiya han bug-os nga bungto ngada han iya kamatay.

¹⁵ Niyan sumati an mga tawo han Israel nga an bisan hin-o nga magtunglo han Dyos kinahanglan mag-antos hiya han mga bunga han iya pagtalapas,

¹⁶ ngan kinahanglan patayon hiya. Bisan hin-o nga Israelita o lumalangyaw nga nag-uokoy ha Israel nga magtunglo han Ginoo, kinahanglan pagbatoon hiya han bug-os nga bungto ngada han iya kamatay.

¹⁷ “Pagpapatayon man an bisan hin-o nga magpatay hin tawo,

¹⁸ ngan bisan hin-o nga magpatay hin hayop hin iba nga tawo, kinahanglan liwanan ini niya; an prinsipyo amo ini: kon kinabuhi an imo ginkuha, kinabuhi liwat an imo igbabayad.

¹⁹ “An tawo nga makadaot hin lain nga tawo, an bisan ano nga iya nabuhat pagbubuhaton man ini ha iya.

²⁰ Kon nakabari hiya hin usa nga tul-an, pagbabarian man hiya hin usa han iya mga tul-an; kon nakabuta hiya hin usa nga mata, pagbubutahon man an usa han iya mga mata. Kon nakangiho hiya hin usa nga ngipon, pagngingihoan man hiya hin usa han iya mga ngipon. Pagbubuhaton man ha iya an bisan ano nga pagdaot nga iya nabuhat ngadto hin lain nga tawo.

²¹ Bisan hin-o nga magpatay hin mananap, kinahanglan pagliwanan niya ini, kundi an bisan hin-o nga magpatay hin tawo, kinahanglan patayon liwat hiya.

²² Iginpapahinungod ini nga balaod ha iyo ngatanan nga mga Israelita ngan mga lumalangyaw nga nag-uokoy dida ha iyo, kay ako an Ginoo nga iyo Dyos.”

²³ Han kahuman ni Moises pagsiring hini ngadto han mga tawo han Israel, iginggawas nira ha kampo an tawo ngan ginbato hiya ngada han iya kamatay. Dida hini nga paagi gintuman han mga tawo han Israel an iginsugo han Ginoo kan Moises.