Levitico 22 - Samarenyo Meaning-Based Bible (1984)

Mga Pagkabaraan han mga Halad

¹ Ginsugo han Ginoo hi Moises

² hin pagsumat kan Aaron ngan han iya mga anak nga kalalaken-an, “Kinahanglan diri niyo pagpakaalohan an akon baraan nga ngaran, sanglit pagtahora niyo an baraan nga mga halad nga iginpapahinungod ha akon han mga tawo han Israel. Hi ako an Ginoo.

³ An bisan hin-o han iyo mga tulin, samtang mahugaw pa hiya sumala han seremonyas, nga magpasipara hin paghirani han baraan nga mga halad nga iginhalad ha akon han mga tawo han Israel, diri na gud hiya makakag-alagad dida han altar. Pagtutumanon ini ha ngatanan nga panahon nga tiarabot. Hi ako an Ginoo.

⁴ “Waray han mga tulin ni Aaron nga may-ada sakit nga sanla, o may nag-aawas ha iya ikinatawo nga makakakaon han bisan ano han baraan nga mga halad tubtob nga magmalinis na hiya sumala han seremonyas. Mahugaw an bisan hin-o nga padi kon kumamkam hiya hin bisan ano nga mahugaw nga butang pinaagi hin pakasaghid hin minatay, o kon inawasan hiya han iya binhe,

⁵ o kon nakabag-id hiya hin mahugaw nga mananap o tawo.

⁶ An bisan hin-o nga padi nga nagin mahugaw magpapabilin nga mahugaw tubtob han pagkagab-i, ngan kinahanglan, diri hiya kumaon han bisan ano nga baraan nga mga halad tubtob han pakakarigos niya.

⁷ Katunod han adlaw malinis na hiya, ngan makakakaon na hiya han baraan nga mga halad nga amo an iya pagkaon.

⁸ Diri hiya makaon han karne han bisan ano nga mananap nga namatay ha iya kalugaringon o ginpatay hin ihalas nga kamanampan; makakahugaw ini ha iya. Hi ako an Ginoo.

⁹ “Pagtutumanon han ngatanan nga kapadian an mga turumanon nga akon iginhatag. Kon diri, magigin salaan hira ngan mapatay hira kay ginsupak nira an baraan nga mga turumanon. Hi ako an Ginoo ngan ako an nagbabaraan ha ira.

¹⁰ “An mga sakop gud la han padianon nga panimalay an makakakaon han bisan ano han baraan nga mga halad; waray iba nga makakakaon hini—diri ngani in bisan usa ka tawo nga nag-uokoy kaupod hin padi o sinuholan niya.

¹¹ Kundi an mga oripon han padi nga pinalit han iya kalugaringon nga kwarta o natawo dida han iya panimalay makakakaon han pagkaon nga kinakarawat han padi.

¹² Diri makakakaon hin bisan ano han baraan nga mga halad in babaye nga anak hin padi, nga nakaasawa hin diri padi.

¹³ Kundi an anak nga babaye nga nabalo o binulagan, nga waray mga anak, ngan binmalik pag-ukoy didto han balay han iya amay, sugad nga usa nga sakop, makakakaon han pagkaon nga kinakarawat han iya amay nga usa nga padi. An mga sakop gud la han padianon nga panimalay an makakakaon hini.

¹⁴ “Kon kumaon hin bisan ano han baraan nga mga halad in bisan hin-o nga diri sakop hin padianon nga panimalay, kundi diri niya tinuyo an pagkaon hini, kinahanglan baydan niya an padi han ngatanan upod an patubo nga 20 por syento.

¹⁵ Diri pagpasipad-an han kapadian an baraan nga mga halad

¹⁶ pinaagi hin pagtugot hin pagpakaon hini hin bisan hin-o nga tawo nga waray katungod hin pagkaon hini; magdadara ini hin kasal-anan ug kastigo ngada hin sugad nga tawo. Hi ako an Ginoo ngan ako an nagbabaraan han mga halad.”

¹⁷ Ginsugo han Ginoo hi Moises

¹⁸ hin paghatag kan Aaron ngan han iya mga anak nga kalalaken-an ngan han ngatanan nga mga tawo han Israel hinin masunod nga mga turumanon. Kon maghalad hin usa nga halad nga tutuboron in bisan hin-o nga Israelita o lumalangyaw nga nag-uokoy ha Israel, bisan hin pagtuman hin usa nga saad o hin usa nga iya kaburot-on nga halad, kinahanglan waray gud mga dum-it an hayop.

¹⁹ Basi karawton ini, kinahanglan lalaki ini nga waray gud mga dum-it.

²⁰ Kon maghalad kamo hin bisan ano nga hayop nga may mga dum-it, diri ini kakarawton han Ginoo.

²¹ Kon maghalad in usa ka tawo hin usa nga halad hin pagkaurosa ngadto han Ginoo, bangin ha pagtuman hin usa nga saad o hin usa nga iya kaburot-on nga halad, kinahanglan waray gud mga dum-it an hayop kon karuyag niyo nga karawton ini.

²² Ayaw paghalad ha Ginoo hin hayop nga buta, o piang, o binigtingan, o may nag-aawas nga katol, o kaduntan, o tabukaw. Ayaw paghalad dida han altar hin sugad nga mga hayop para hin usa nga halad nga pagkaon.

²³ Makakaghalad kamo hin hayop nga may kulang o diri hingpit nga kaporma ha iya lawas sugad nga iyo kaburot-on nga halad, kundi diri ini kakarawton ha pagtuman hin usa nga saad.

²⁴ Ayaw paghalad ha Ginoo hin bisan ano nga hayop kanay mga lisik napusa, nautod, napilasan, o nakuha. Diri ini tugot dinhe ha iyo tuna.

²⁵ Ayaw kamo paghalad para hin usa nga halad nga pagkaon hin bisan ano nga hayop nga kanan lumalangyaw. Iniisip nga may karat-an in sugad nga mga hayop ngan diri ini kakarawaton.

^26-27 Kon matawo in usa nga nati nga baka, karnero, o kanding, kinahanglan diri ini pagkuhaon dayon tikang han iroy hini sulod hin pito ka adlaw, kundi katapos han pito ka adlaw mahimo karawaton na ini nga usa nga halad nga pagkaon.

²⁸ Ayaw niyo idungan hin paghalad nga tutuboron nga unong, ha amo manta nga adlaw, in baka ngan an iya nati, o in karnero ngan an iya nati, o in kanding ngan an iya nati.

²⁹ Kon maghalad kamo hin usa nga halad hin pagpasalamat ngadto han Ginoo, sunda niyo an mga turumanon basi karawton kamo;

³⁰ kaona ini niyo ha amo manta nga adlaw ngan ayaw gud pagsalin hini ngada han pagkabuwas.

³¹ Nagsiring an Ginoo, “Pagsugta niyo an akon mga sugo; ako an Ginoo.

³² Ayaw niyo pagpakaalohi an akon baraan nga ngaran; kinahanglan kilalahon ako nga baraan han ngatanan nga mga tawo han Israel. Hi ako an Ginoo ngan ako an nagbabaraan ha iyo;

³³ ngan ginpagawas ko kamo ha Ehipto basi ako magin iyo Dyos. Hi ako an Ginoo.”