Levitico 2 - Samarenyo Meaning-Based Bible (1984)

Igintutdo an Paghalad hin mga Halad nga Pagkaon

¹ Kon may maghalad hin pagkaon ngadto han Ginoo, kinahanglan iya paggilingon anay ini nga mahimo nga harina. Kinahanglan pagbutangan ini niya hin lana hin olibo ug insyenso,

² ngan pagdad-on ini ngadto han kapadian nga mga tulin ni Aaron. Makuha an nangungulo nga padi hin usa ka kumkom han harina ug hin lana ngan han ngatanan nga insyenso ngan pagtutuboron ini dida ha altar sugad hin usa nga hinumdoman nga ini ngatanan iginhalad ngadto han Ginoo. Makakalipay han Ginoo an kahamot hini nga halad nga pagkaon.

³ Kanan kapadian na an salin han halad nga pagkaon labi hin baraan ini kay kinuha ini tikang han pagkaon nga iginhalad ngadto han Ginoo.

⁴ Kon tinapay nga hinudno an ighalad, kinahanglan paghimoon ini nga waray patubo. Mahihimo nga magdakmol ini nga mga tinapay nga hinimo hin harina nga sinaktan hin lana hin olibo, o magnipis nga mga torta nga pinahiran hin lana hin olibo.

⁵ Kon tinapay nga linuto dida hin lata nga parilyahan an ighalad, kinahanglan paghimoon ini hin harina nga sinaktan hin lana hin olibo, kundi waray patubo.

⁶ Kunota ini ngan ipisi hin lana kon ighalad niyo ini.

⁷ Kon tinapay nga linuto dida hin karaha an ighalad, kinahanglan paghimoon ini hin harina ngan lana hin olibo.

⁸ Dad-a ini nga halad ngadto han Ginoo ngan ighatag ini ngadto han padi nga magdadara hini ngadto ha altar.

⁹ Iibanan ini han padi sugad nga tigaman nga iginhalad na ini ngatanan ngadto han Ginoo ngan pagtutuboron ini niya dida han altar. Nakakalipay han Ginoo an kahamot hini nga halad nga pagkaon.

¹⁰ Kanan kapadian na an salin han halad; labi hin ka baraan ini kay kinuha ini tikang han pagkaon nga iginhalad ngadto han Ginoo.

¹¹ Waray han mga halad nga pagkaon nga iyo ighahalad ngadto han Ginoo nga paghihimoon nga may patubo; kinahanglan diri gud kamo gumamit hin patubo o dugos dida hin pagkaon nga ighahalad ngadto han Ginoo.

¹² Pagdadad-on niyo ngadto han Ginoo in usa nga halad han syahan nga abot han gin-aani niyo ha kada tuig, kundi diri ini pagtutuboron dida han altar.

¹³ Asini an tagsa nga halad nga pagkaon, kay natindog an asin han ginsaaran niyo ngan han Dyos. (Kinahanglan pag-asinan niyo an ngatanan niyo nga mga halad.)

¹⁴ Kon magdara kamo ngadto han Ginoo hin usa nga halad han syahan nga iyo inani nga pagkaon, sanlaga o gilinga niyo an iyo ighahalad.

¹⁵ Sakti ini hin lana hin olibo ngan hin insyenso.

¹⁶ Pagtutuboron han padi ito nga bahin han giniling nga halad ug an lana sugad nga usa nga hinumdoman, ngan an ngatanan liwat nga insyenso, sugad nga usa nga halad nga pagkaon ngadto han Ginoo.