Levitico 18 - Samarenyo Meaning-Based Bible (1984)

May Igindidiri nga mga Pakighilawas

¹ Ginsiring han Ginoo hi Moises

² nga sumatan an mga tawo han Israel, “Ako amo an Ginoo nga iyo Dyos.

³ Ayaw niyo pagsunda an mga ginbubuhat han mga tawo ha Ehipto nga iyo hadto anay gin-ukyan, o han mga tawo didto ha tuna han Canaan diin gindadara ko kamo yana.

⁴ Pagsugta niyo an akon mga balaod ngan pagbuhata an akon igsusugo. Hi ako an Ginoo nga iyo Dyos.

⁵ Pagsunda niyo an mga turumanon ngan an mga balaod nga ihinahatag ko ha iyo. Matatalwas niyo an iyo kinabuhi kon magtuman kamo. Ako amo an Ginoo.”

⁶ Iginhatag han Ginoo inin masunod nga mga turumanon. Ayaw pakighilawas bisan kan kanay nga imo uropod.

⁷ Ayaw pagpakaalohi an imo amay pinaagi hin pakighilawas han imo iroy. Kinahanglan diri nimo pagpakaalohan an kalugaringon mo nga iroy.

⁸ Ayaw pagpakaalohi an imo amay pinaagi hin pakighilawas bisan kan kanay han iba niya nga mga asawa.

⁹ Ayaw pakighilawas han imo bugto nga babaye o han imo bugto ha amay o ha iroy nga babaye, bisan nagtubo o waray dida han amo manta nga balay upod ha iyo.

¹⁰ Ayaw pakighilawas han imo apo nga babaye; makaarawod ini nga buhat.

¹¹ Ayaw pakighilawas han imo bugto ha gawas nga babaye; bugto mo liwat hiya.

^12-13 Ayaw pakighilawas hin imo dada, bisan bugto hiya han imo amay o han imo iroy.

¹⁴ Ayaw pakighilawas han asawa han imo bata; dada mo liwat hiya.

¹⁵ Ayaw pakighilawas han imo umagad nga babaye

¹⁶ o han asawa han imo bugto.

¹⁷ Ayaw pakighilawas han anak o apo nga babaye hin usa nga babaye nga imo iginkahilawas; bangin nauurupod pa hiya nimo, ngan mangil-ad ini nga buhat.

¹⁸ Ayaw pagkuhaa an bugto nga babaye han iyo asawa nga usa han imo mga asawa samtang buhi pa an imo asawa.

¹⁹ Ayaw pakighilawas hin babaye samtang reniregla hiya, kay mahugaw hiya sumala han seremonyas.

²⁰ Ayaw pakighilawas han asawa hin lain nga lalake, makakahugaw ini ha imo sumala han seremonyas.

²¹ Ayaw igtubyan in bisan hin-o han imo mga anak nga pagsunogon basi ighalad ngadto han diyos nga hi Moloc, kay kon pagbuhaton mo ini, waray ka magtahod han ngaran han Dyos nga Ginoo.

²² Waray gud lalake nga makighilawas hin igkasi lalake; napupungot gud hini an Dyos.

²³ Waray gud lalake o babaye nga makighilawas hin mananap; makakahugaw ha iya ini nga mangil-ad nga buhat.

²⁴ Ayaw kamo pagtugot nga mahugawan kamo pinaagi hini nga mga buhat, kay amo ini an nakahugaw han mga pagano nga nag-ukoy ha tuna una ha iyo, ngan ginpaiwas hira han Ginoo basi makasulod kamo.

²⁵ Nakahugaw han tuna an ira mga binuhatan, sanglit ginkastigo han Ginoo an tuna ngan ginsalikway han tuna an mga tawo nga naukoy didto.

^26-27 Ginbuhat nira ini ngatanan nga mangil-ad nga mga butang, ngan ginhugawan nira an tuna, kundi kinahanglan diri niyo pagbuhaton ini. Kinahanglan pagtumanon niyo ngatanan nga mga Israelita o mga lumalangyaw nga nag-uokoy tampo ha iyo an mga balaod ngan mga sugo han Ginoo,

²⁸ ngan diri kamo igsasalikway han tuna sugad han pagsalikwaya han mga pagano nga nag-ukoy didto una ha iyo.

²⁹ Maaram man kamo nga bisan hin-o nga magbuhat hin bisan hain hini nga mangil-ad nga mga butang, diri na hiya pag-iisipon nga sakop han bungto han Dyos.

³⁰ Ngan nagsiring an Ginoo, “Pagsugta niyo an mga sugo nga akon iginhatag ngan ayaw niyo pagsunda an mga binuhatan han mga tawo nga nag-ukoy didto han tuna una ha iyo, ngan ayaw gud pagtugot nga mahugawan kamo pinaagi hin pagbuhat hini nga mga maglaw-ay nga butang. Hi ako an Ginoo nga iyo Dyos.”