Levitico 12 - Samarenyo Meaning-Based Bible (1984)

May Turumanon han mga Nag-aanak

¹ Iginhatag han Ginoo kan Moises ini nga mga turumanon

² para han mga tawo han Israel. Sulod hin pito ka adlaw katapos mag-anak hin lalake in usa nga babaye, mahugaw hiya sumala han seremonyas sugad han mga adlaw nga inaabot hiya han iya ikinabulan nga regla.

³ Dida han ikawalo ka adlaw pagtotorion an bata.

⁴ Niyan mahulat an iroy hin 33 ka adlaw san-o hiya magmalinis tungod han kaibani ha iya hin dugo dida han iya pag-anak; kinahanglan diri hiya kumapot hin bisan ano nga baraan nga butang, ngan diri hiya sumakob han baraan nga Tulda tubtob han kahuman na han paglinis ha iya.

⁵ Sulod hin 14 ka adlaw katapos mag-anak hin babaye in usa nga babaye, mahugaw hiya sumala han seremonyas, sugad nga mahugaw hiya kon inaabot hiya han iya ikinabulan nga regla. Niyan 66 pa ka adlaw nga magmamalinis hiya sumala han seremonyas tungod han kaibani ha iya hin dugo dida han iya pag-anak.

⁶ Kon matapos na an panahon han paglinis tungod hin pag-anak niya—ma lalake o babaye, magdadara hiya ngadto han padi didto ha agian han Tulda han Ginoo hin usa nga nati nga karnero nga usa ka tuig an panuigon para hin halad nga tutuboron, ngan hin usa nga tukmo o sarapati para hin halad tungod hin sala.

⁷ Ighahalad han padi ngadto han Ginoo an iya dara ngan pagbubuhaton an mga seremonyas hin pagkuha han iya pagkamahugaw, ngan magmamalinis na hiya sumala han seremonyas. Amo ini an angay pagbuhaton hin usa nga babaye katapos niya pag-anak.

⁸ Kon diri man makakaakos an babaye hin nati nga karnero, magdadara hiya hin duha nga sarapati o duha nga tukmo, an usa para hin halad nga tutuboron ngan an ikaduha para hin halad tungod hin sala, ngan pagbubuhaton han padi an seremonyas hin pagkuha han iya pagkamahugaw, ngan magmamalinis hiya sumala han seremonyas.